विराटनगर महानगरपालिकामा ५ भदौसम्म लकडाउन थपिएको छ । कोरोना संक्रमितको संख्या झनै बढ्दो क्रममा रहेकाले ५ भदौसम्म लकडाउन थपिएको विराटनगर महानगरपालिका कार्यालयले जनाएको छ ।
महानगरले यसअघि १७ देखि ३० साउनसम्मका लागि दोस्रोपटक लकडाउन घोषणा गरेको थियो । तर, कोरोना संक्रमण निरन्तरण बढिरहेकाले लकडाउन थप्नुपरेको महानगरपालिकाका प्रमुख भीम पराजुलीले बताए । उनका अनुसार बिहीबार बसेको महानगरस्तरीय कोभिड– १९ क्राइसिस म्यानेजमेन्ट कमिटी (सिसिएमसी) को बैठकले विराटनगर महानगरभर ५ भदौसम्म लकडाउन कायमै राख्ने निर्णय गरेको हो ।
विराटनगर महानगरपालिका जनस्वास्थ्य महाशाखा प्रमुख रमेश कार्कीका अनुसार २९ साउनसम्म विराटनगरमा कोरोना संक्रमितको संख्या चार सय १४ पुगेको छ । संक्रमितमध्ये ६९ जना उपचारपछि घर फर्किएका छन् । हालसम्म विराटनगरमा पाँचजनाले कोरोनाकै कारण ज्यान गुमाइसकेका छन् । विराटनगरको विभिन्न स्थानमा रहेका क्वारेन्टाइनमा अझै एक सय ३० जना छन् । हालसम्म विराटनगरमा चार हजार चार सय ४७ जनाको पिसिआर परीक्षण भएको छ ।
