रामधुनी । सुनसरीको वराहक्षेत्रमा १२ वर्षीय बालिकाको हत्या गरिएको अवस्थामा शव भेटिएको छ ।
वराहक्षेत्र नगरपालिका वडा नं १ कटहरेकी बालिका मिना राईको शव भेटिएको हो । जिल्ला प्रहरी कार्यालय सुनसरीका प्रहरी उपरीक्षक कमल थापाका अनुसार बालिकाको शव उनकै घरमा भेटिएको हो ।
‘शवको प्रकृति हेर्दा हत्या देखिन्छ, घटनाको अनुसन्धान भइरहेको छ’ उनले भने ‘घटनामा संलग्न एक जनालाई नियन्त्रणमा लिइएको छ ।’ शव भेटिएको घरमा धरानस्थित सङ्घीय प्रहरी इकाई कार्यालयबाट कुकुरसमेत मगाई अनुसन्धान भइरहेको थापाले बताए ।
कुकुरले नियन्त्रणमा लिएका ८ जना व्यक्तिहरुबाट १ जनालाई सङ्केत गरेपछि उनलाई नियन्त्रणमा लिइएको प्रहरी उपरीक्षक थापाले जानकारी दिए ।
हत्या भएकी बालिकाका बुवाआमा शुक्रवार राती छिमेकीको घरमा धामी बसेको हेर्न गएका थिए । राती २ बजे धामी बसेको हेरेर आमा,बुबा घर फर्किँदा उनी घर भित्रै मृत अवस्थामा भेटिएको बताइएको छ ।
बालिकाको राती नै हत्या भएको प्रारम्भिक अनुसन्धानले देखाएको छ । हत्या भएको स्थानमा सिसाका टुक्राहरु भेटिएको बताइएको छ ।
