रामधुनी । उदयपुरको बेलका नगरपालिकामा निजी विद्यालयहरुले मात्रै प्रयोगमा ल्याएको स्कुल बस सामुदायीक विद्यालयमासमेत सञ्चालन गरिने भएको छ ।
वडा नं ४ स्थित जनता नमुना माध्यामिक विद्यालय गुरुङ्चौरीले नगरमै पहिलो पटक स्कुल बस संचालनमा ल्याउने गरि अन्तिम तयारी थालेको छ । विद्यालयले यसअघि स्कुल बस खरीदका लागि टेन्डरसमेत आव्हान गरिसकेको छ ।
नेपाल सरकारको भन्सार छुट सहुलियतमा ४० सिट क्षयमता भएको बस १८ लाख ५० हजारमा खरिद गर्न लागिएको विद्यालय व्यवस्थापन समितिका अध्यक्ष मनोज तामाङले जानकारी दिए । तामाङका अनुसार सम्भवत यसै साताभित्र बस विद्यालयमा आइपुग्ने छ । हाम्रो शब्दसँगको कुराकानीमा उनले भने, ‘अन्य स्कुल बसहरु आवश्यकतानुसार थप गरिदै लगिनेछ ,सम्भवत २ देखि ३ वटासम्म स्कुल बस विद्यालयमा थप्छौँ ।’
निम्नवर्गीय जनताका छोरीछोरीलाई गुणस्तरिय शिक्षा र यातायातको थप सुविधासहित विद्यालय संचालनको तयारीमा रहेको प्रधानाध्यापक समर बहादुर राई बताउँछन् । निजी विद्यालयसँगको प्रतिस्पर्धा भन्दा पनि बिद्यार्थी र अभिभावकहरुको सुविधालाई मध्यनजर गरेर बस खरिदको प्रकृयामा विद्यालय लागेको राइको भनाई छ ।
बेलका नगरमा उक्त मावि यसै बर्षबाट प्राबिधिक धारतर्फ सिभिल इन्जिनियरीङ् सुरु भएको र नेपाल सरकारबाट नमुना विद्यालयको रुपमासमेत छनौट भएको छ । यसै बर्षबाट अंग्रेजी माध्यमबाट कक्षा ८ सम्म अध्यापन गराउने गरी तयारी भइरहेको प्रधानाध्यापक राईले बताए ।
