बराहक्षेत्र । कोरोना महामारीको अवधिमा बराहक्षेत्रभर सामान्य प्रकृतिका आपराधिक क्रियाकलापहरुमा वृद्धि भएको तथ्याङ्कले देखाएको छ ।
इलाका प्रहरी कार्यालय महेन्द्रनगर चक्रघट्टीबाट पछिल्लो ६ महिनाको अवधिमा मात्र ३३ वटा मुद्दा दर्ता भएका छन् । देशब्यापी लकडाउन जारी भएको चैत्र ११ गतेदेखि असोज २४ सम्ममा उक्त संख्यामा इप्रका चक्रघट्टीबाट विभिन्न शीर्षकमा मुद्दा दर्ता गरिएको इप्रका चक्रघट्टीका इन्चार्ज पाण्डवकुमार राजबंशीले जानकारी दिएका छन् ।
इप्रकाको चैत्र ११ देखि आश्विन २४ गतेसम्मको तथ्याङ्क अनुसार सवारी ज्यान २, पशुकरणी १, अभद्र व्यबहार ८, ज्यान मार्ने उद्योग ४, जबर्जस्ती करणी २ र अपहरण तथा ज्यान बन्धकमा ४ मुद्दा दर्ता भएका छन् । त्यस्तै, लागूऔषध ३, जक उद्योग १, कर्तव्य ज्यान ३, बाल यौन दुरुपयोग १, बहुविवाह १, कुटपिट तथा अङ्गभङ्ग १ र चोरी शिर्षकमा २ मुद्दा दर्ता भएको तथ्याङ्कमा उल्लेख छ ।
इप्रका इन्चार्ज राजबंशीका अनुसार गतवर्षहरुका तुलनामा यसपटक लकडाउन भएकाले पनि सामान्य प्रकृतिका उजुरीको संख्यामा वृद्धि भएको हो । ‘यसपालि लकडाउन भएकाले यसअबधिमा सामान्य गालीगलौज, महिला तथा बालबालिकामाथिको हिंसा र घरायसी समस्यामा वृद्धि भएको देखिन्छ ।’ उनले थपे, ‘सामान्य घटनामा वृद्धि भएपनी मुद्दा चल्ने किसिमका घटनामा भने गतवर्षको तुलनामा कमि आएको छ ।’
बैशाख १ देखि असोज २४ सम्म १४५ ठाडो उजुरी परेको स्रोतले जनाएको छ । विशेषगरी कुटपिट, गाली गलोज, शान्ति सुरक्षाको माग, सवारी दुर्घटना लगायतका घटनामा उजुरी बढेको तथ्याङ्कले देखाएको छ । यसअबधिमा मात्र कुटपिट ३२, गालीगलोज ४४, शान्ति सुरक्षा ९, चोरी ६, लेनदेन ४, सवारी दुर्घटना ५ र घरायसी समस्या सहित अन्य प्रकृतिका ४६ उजुरी रहेका छन् । इप्रकामा आएका यस्ता प्रकारका उजुरीहरु मध्ये ८० प्रतिशत उजुरी मिलापत्र गराइएको स्रोतको दाबी छ ।
