रामधुनी । रामधुनी नगरपालिकाको मुख्य बजार मानिएको झुम्का बजारमा लगाइएको सीसीक्यामेरा जडानको खर्चबारे रामधुनी लेखा समितिले छानबिन गर्ने भएको छ ।
क्यामेरा जडानका क्रममा आर्थिक अनियमितता भएको आशंकामा जडानको खर्चबारे छानबिन गर्ने तयारी गरिएको रामधुनी लेखा समितिका एक सदस्यले बताएका छन् ।
गत बर्ष २२ लाख लागतमा जडान गरिएको भनिएको सीसीक्यामेरा गुणस्तरहीन भएको अरोप लाग्दै आएको छ । बजारमा चोरी भएको समयमा धेरै क्यामेरा बिग्रिएकोसमेत पाइएको थियो । पटकपटक बजारमा चोरी हुँदासमेत क्यामेराले सहयोग नपुर्याएपछि त्यसको गुणस्तर र लागतमाथि नै प्रश्न उठ्ने गरेको थियो ।
जनस्तरको प्रश्नलाई सम्बोधन गर्दै यसबारे छानबिन गर्ने निर्णयमा आफुहरु पुगेको रामधुनी लेखा समितिले जनाएको छ । समितिका एक सदस्यले हाम्रो शब्दसँग भने, ‘क्यामेरा जडानका सबै विल भपाई हामीले मागेका छौँ, त्यो प्राप्त भएपछि छानबिन हुन्छ । छानबिन गर्ने निर्णय लेखा समितिले गरिसकेको छ ।’
