धरान । सुनसरीको धरानमा २२ वर्षीय दलित महिलामाथि सामूहिक बलात्कार भएको इलाका प्रहरी कार्यालय धरानले जनाएको छ ।
महिलाका श्रीमान् घरबाहिर मजदुरीमा गएको मौका छोपेर नाताले देवर पर्ने दुई जनाले सामुहिक बलात्कार गरेको इलाका प्रहरी कार्यालय धरानका इन्स्पेक्टर राजन ओलीले जानकारी दिए ।
डर धम्की देखाएर बलात्कार गरेको भन्दै पीडित महिलाले देवर नाता पर्ने धरानका २२ र २३ वर्षीय युवाहरूविरुद्ध आइतबार किटानी जाहेरी दिएकी थिइन ।
आरोपित मध्ये २२ वर्षीय युवालाई प्रहरीले सोमबार पक्राउ गरेको छ । पक्राउ परेका युवा पीडित महिलाको काका ससुराका छोरा हुन् । २३ वर्षीय अर्का युवा भने फरार भएका छन् ।
बलात्कार घटना सार्वजनिक भएपछि परिवारमै मिलाउने प्रयाससमेत भएको थियो । उनीहरूले ती महिलालाई हत्या गर्नेसम्मको धम्की दिएको प्रहरीको भनाई छ ।
पीडित महिला एक छोरा र एक छोरीकी आमा हुन । देवरहरू पनि भाउजूसँगै बस्दै आएका थिए । उनका श्रीमान् मानसिक रोगी रहेको ओलीले बताए ।
घटनाबारे थप अनुसन्धान भइरहेको प्रहरीले जनाएको छ।
