सुनसरी । नेपाली काँग्रेसका नेता गगन थापाले नेकपा अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीलाई लगाएका आरोपहरुको सडक र सदनबाट जवाफ माग्ने बताएका छन् ।
बुधबार एक विज्ञप्ती जारी गर्दै थापाले यस्तो बताएका हुन् ।
‘नेकपाका अध्यक्ष प्रचण्डले आफ्नै पार्टीका तर्फबाट बन्नुभएको प्रधानमन्त्रीको सन्दर्भमा उठाउनुभएको एकएक प्रकरणको हिसाबकिताब अब संसद् र सडक दुबैबाट मागिने छ ।’ उनी भन्छन्, ‘यस प्रकणमा उठेका र उठाइएका सार्बजनिक र राष्ट्रिय सरोकारका बिषयलाई फगत पार्टीको आन्तरिक शक्ति–संघर्षबीच उठेको मनमुटावको तितो अभिब्यक्तिका रुपमा कम्तिमा प्रतिपक्षले लिने छैन ।’
केही दिन अघि अध्यक्ष प्रचण्डले नेकपा सचिवालयको बैठकमा लिखित प्रस्ताव प्रस्तुत गर्दै अर्का अध्यक्ष तथा प्रधानमन्त्रीमाथि बिभिन्न आरोप लगाएका थिए ।
‘भ्रष्टाचार, दुराचार, व्यभिचार र कमिसन खोरी’ नियन्त्रण गर्न सार्थक पाइला चाल्नुको सट्टा वाइड बडी विमान खरिद प्रकरण, सुरक्षण छापाखाना खरिद र सञ्चार मन्त्रीको टेप प्रकरण, यति होल्डिङ्स सँगको अपारदर्शी र शंकास्पाद कारोबार, स्वास्थ्य सामाग्री खरिदमा ओम्नी समूहसँग साँठगाँठ र बजेट सार्वजनिक गर्नु पूर्व गोप्य राख्नुपर्ने करको दर रेट परिवर्तनलाई चुहाएर विद्युतीय सवारी र चकलेट आयातमा अनियमितता जस्तो प्रकरणमा मुछिएकाहरूको प्रतिरक्षा गरेर ओलीले भ्रष्टाचारलाई प्रोत्साहन र संरक्षण गरेको जस्तो आरोप प्रचण्डको थियो ।
