इनरुवा । आफ्नै नगरपालिकाविरुद्ध अख्तियार दुरुपयोग अनुसन्धान आयोग जाने (मुद्दा हाल्ने) चेतावनीपछि आफुलाई हाँसोको पात्र बनाइको इनरुवाकी उपमेयर जमुना गौतम पोखरेलले गुनासो गरेकी छिन् ।
नगरपालिकामा भएका अनियमितताको विषयमा आफुले राखेको धारणालाई अर्थको अनर्थ लगाउँदै आक्षेप लगाउने शैलीमा जनाइएको प्रतिकृयालाई पोखरेलले आफुमाथि सुनियोजित प्रहार भनेकी छिन् ।
उनले प्रेस विज्ञप्ती जारी गर्दै आफुले राखेका मागको सम्बोधन गर्नुको साटो आफुमाथि कटाक्ष शैलीमा बाहिरिएको अभिव्यक्तिप्रति आफ्नो गंभिर ध्यानाकर्षण भएको बताएकी छिन् ।
विज्ञप्तीमा भनिएको छ , ‘नगरपालिका भित्र भएका अनियमितताको आशंका लगायतका विषयमा आफुले उठान गरेको विषयलाई लिएर इनरुवा नगरपालिकाले कात्तिक २७ गते पत्रकार सम्मेलन गरी सार्वजनिक गरेको धारणाप्रति मेरो गम्भिर ध्यानाकर्षण भएको छ ।’
प्रशासकीयक अधिकृतले नगरपालिकाको तर्फबाट आधिकारिक धारणा सार्वजनिक गर्दै आफ्नो अभियानमा सहयोग गर्छु भनेको विषयलाई उप–प्रमुखले विज्ञप्तीमा आफुमाथिको सुनियोजित प्रहार गरिएको ठहर गरेकी छिन् ।
उनले विज्ञप्तीमा ‘अख्तियार जानुस, कार्यालयको साथ र सहयोग रहने छ’ भनिनुलाई कुटिल शब्दजाल फ्याकेको भनेकी छिन् ।
संचारकर्मीहरुसँगको कुराकानीमा उप–प्रमुख पोखरेलले आफु आफ्नो अभियानबाट पछि नहट्ने र कुण्ठित बनाइएको आफ्नो अधिकार प्राप्तिसहित जनताको सुसूचित हुन पाउने अधिकारको सवालमा लडिरहने बताइन् ।
