१६ मंसिर, रामधुनी । सुनसरीको रामधुनी नगरपालिकामा १५ शैयाको अस्पताल शिलान्यास भएको छ ।
वडा नं ६ स्थित बकलौरी स्वास्थ्य चौकीलाई स्तरोन्नती गर्दै नगर अस्पताल बनाउँने नगरपालिकाको निर्णयसँगै सोमबार अस्पताल शिलान्यास गरिएको हो ।
सरकारले सोमबार देशभर ३ सय ९६ स्थानीय तहमा आधारभूत अस्पताल शिलान्यास गरेको छ ।
नेपाल कम्युनिष्ट पार्टी (नेकपा) का नेता एवम् पूर्वमन्त्री भिम आचार्य, पूर्व राज्यमन्त्री रामकुमारी चौधरी, प्रदेशसभा सदस्य जयकुमार राई, नगरप्रमुख जयप्रकाश चौधरी लगायतले संयुक्त रुपमा शिलान्यास गरेका थिए ।
अस्पताल बकलौरीमा नभई ढेडीगाउँमा बनाउनुपर्ने माग राख्दै आएको ‘ढेडीगाउँ नगर अस्पताल बचाउ संघर्ष समिति’ ले कार्यक्रमस्थलबाहिर बिरोधस्वरुप कालो झण्डा देखाउँदै प्रदर्शन गरेको थियो ।
संघर्ष समितिलाई जसता जनता समाजवादी पार्टी (जसपा) कोसमेत समर्थन रहेको थियो । बिरोधमा जसपाका रामधुनी अध्यक्ष रामबहादुर खड्कासमेत सहभागी बनेका थिए ।
कडा सुरक्षाकाबीच अस्पताल शिलान्यास भएको थियो । विरोध प्रदर्शन गर्नेलाई स्थानीय युवाहरुले ‘बिकास बिरोधी मूर्दावाद’ भन्दै झण्डा खोसेर जलाइदिएका थिए ।
अस्पतालको कुल लागत १८ करोड ६२ लाख हाराहारीमा रहेको र यो बर्ष ३ करोड बजेट प्राप्त हुने नगरपालिकाले जनाएको छ ।
प्रमुख प्रशासकिय अधिकृत ओमकारप्रशाद न्यौपानेका अनुसार बहुबर्षिय योजनाको रुपमा अस्पताल बन्ने र त्यसका लागि २ बर्षको समय रहेको छ ।
