१७ मंसिर, रामधुनी । ढेडीगाउँमा बनाउँनुपर्ने नगर अस्पताल बकलौरीमा बनाएको भन्दै विरोध प्रदर्शन गर्ने क्रममा आफुहरुमाथि आक्रमण गरिएको जनता समाजवादी पार्टी (जसपा) ले आरोप लगाएको छ ।
मंगलबार पार्टीकोतर्फबाट जसपा रामधुनीका अध्यक्ष रामबहादुर खडकाले एक विज्ञप्ति जारी गर्दै यस्तो आरोप लगाएका हुन् ।
सोमबार सरकारले देशभर आधारभूत अस्पतालको शिलान्यास गरेको थियो । त्यसमा रामधुनी नगरपालिकाले वडा नं ६ स्थित बकलौरी स्वास्थ्य चौकीलाई स्तरोन्ती गर्दै अस्पताल बनाउँन शिलान्यास कार्यक्रम राखेको थियो ।
बकलौरीमा नभई ढेडीगाउँमा अस्पताल बनाउँनुपर्ने अडान राख्दै आएको एक संघर्ष समिति र त्यसलाई समर्थन गरिरहेको जसपा पार्टीले शिलान्यास स्थलबाहिर बिरोधस्वरुप कालो झण्डा देखाएका थिए ।
कालो झण्डा देखाउँने क्रममा जसपाका नगर अध्यक्ष रामबहादुर खडका, सचिव चन्द्रभुषण झा, संघर्ष समितिका संयोजक प्रदिव कुमार चौधरी, सचिव खगिन चौधरी लगायत विरोधमा उपस्थित नेता–कार्यकर्तालाई भाला, खुकुरी र लाठी लिई सांघातिक आक्रमण गर्दासमेत प्रहरी मूकदर्शक बनेको पार्टीद्धारा जारी प्रेस विज्ञप्तिमा उल्लेख गरिएको छ ।
नेकपाका नेता भिम आचार्यको निर्देशनमा आक्रमण भएकोसमेत जसपाको आरोप छ । विज्ञप्तिमा भनिएको छ, ‘नेकपा १ नं प्रदेश इन्चार्ज भिम आचार्यको निर्देशनमा सोही वडा निवासी वडा नं ६ का युवासंघ अध्यक्ष दिनेश श्रेष्ठको नेतृत्वमा १५/२० जनाको समुहले मार–मार भन्दै सांघातिक आक्रमण गर्दा प्रहरी प्रशासन मूकदर्शक रहेकोप्रति जनता समाजवादी पार्टी घोर भर्सना गर्दछ ।’
यहि घटनालाई लिएर जसपा सुनसरी जिल्ला समन्वय समितिलेसमेत प्रेस विज्ञप्ति जारी गर्दै लोकतन्त्रमा शान्तिपूर्ण प्रदर्शन गर्ने जनताको अधिकारलाई कुण्ठित गरी निरंकुश शैलीमा गरेको दमन र आक्रमण गर्न प्रोप्साहन गर्ने सरकारकोसमेत निन्दा गर्दै दोषीमाथि कारवाहीको माग गरेको छ ।
