रामधुनी । नेपाल कम्युनिष्ट पार्टी (नेकपा) सुनसरीको प्रचण्ड–माधव नेपाल समुहले संसद विघटनको विरोधमा आन्दोलन गर्न पार्टीका केन्द्रीय सदस्य एवम सुनसरी जिल्ला इन्चार्ज धर्मराज निरौलाको नेतृत्वमा आन्दोलन परिचालन समिति गठन गरेको छ ।
शनिबार इटहरीमा प्रचण्ड–माधव समुहको सुनसरी जिल्ला कमिटीको विस्तारित बैठक तथा भेलाले १५ सय ९१ सदस्यीय आन्दोलन परिचालन समिति घोषणा गरेको हो ।
आन्दोलनलाई व्यवस्थित बनाउन ३५ सदस्यीय सचिवालय र विभिन्न उपसमितिसमेत गठन गरिएको छ ।
जसअन्तर्गत जिल्ला संगठन विभाग प्रमुख नन्दकुमार बस्नेतको नेतृत्वमा स्वयम्–सेवक परिचालन, प्रदेश कमिटी सदस्य मुक्सामहाङ्ग मेन्याङ्बोको नेतृत्वमा स्रोत परिचालन र प्रेस संगठन प्रदेश १ संयोजक राजन केडीको नेतृत्वमा प्रचार–प्रसार उपसमिति गठन गरिएको आन्दोलन परिचाल समितिका संयोजक निरौलाले जानकारी दिए ।
भेलालाई सम्बोधन गर्दै निरौलाले प्रधानमन्त्री केपी ओलीले असंबैधानीक कदम चालेर संविधानमाथि बञ्चरो प्रहार गरेको आरोप लगाएका थिए । कम्युनिष्ट आन्दोलनका विभिन्न पाटाहरुको चर्चा गर्दै ओली दक्षिणपन्थी विसर्जनवादी भएको निरौलाको भनाई छ । मदन भण्डारी फाउण्डेशन लगायतका नाममा प्रधानमन्त्री ओलीले पहिलादेखि नै पार्टी विभाजनको सुरुवात गरेको उनको आरोप छ ।
त्यस्तै भेलालाई सम्बोधन गर्दै प्रमुख अतिथिसमेत रहेका पार्टीका स्थायी समिति सदस्य एवम् प्रचण्ड–माधव समुहका नेता भीम आचार्यले ओली र राष्ट्रपति विद्यादेवी भण्डारीले देश र पार्टीलाई बर्बाद बनाएको आरोप लगाएका थिए ।
