रामधुनी । हाम्रो शब्दले रामधुनी वडा नं. ६ को मुसहर बस्तीमा विद्यालय नजाने बालबालिकाबारे समाचार प्रकाशन गरेपछि जनता समाजवादी पार्टी (जसपा) रामधुनीका अध्यक्ष राम बहादुर खड्का शैक्षिक सामग्री लिएर उक्त बस्ती पुगेका छन् ।
हाम्रो शब्दले स्थलगत रिपोर्टिङ् गरेर ‘विद्यालयमा टिक्दैनन् रामधुनीका मुसहर बालबालिका’ शिर्षकको समाचार प्रकाशन गरेपछि खड्का आइतबार मुसहर बस्ती पुगेका हुन् ।
कम्युनिष्ट नाम राखेको सरकार देशभर भएपनि सत्ताको भागवण्डामा लिप्त भएर बसेको र राज्य गैरजिम्मेवार बनेपछि आफु मुसहर बस्तीका बालबालिकालाई विद्यालय जानेसम्मको वातावरण तयार पारिदिन त्यहाँ पुगेको खड्काले बताए ।
माथिल्ला सरकारजस्तै रामधुनी नगरपालिकासमेत दलाल पुँजीपतिहरुसँग मिलेर भ्रष्टाचारको भागवण्डा मिलाउँन तल्लिन भएकाले मुसहर, झाँगर लगायत पछाडि परेको समुदायबारे सोच्ने फुर्सद अहिलेका जनप्रतिनिधिहरुलाई नभएको उनको भनाई छ ।
कपी, पेनसिन लगायतका शैक्षिक सामग्री बोकेर मुसहर बस्तीमा आफैँ पुगेका खड्काले भने, ‘राज्यले हात उठाएर भनोस्, रामधुनीका मेयर–उपमेयरले भनुन् –हामी मुसहर, दलित बस्ती जादैनौँ, ती हाम्रा जनता होइनन्, हामी भ्रष्टाचारमा ब्यस्त छौँ ।’
रामधुनी नगरपालिका भ्रष्टाचारमा लिप्त रहेकोसमेत उनले दोहोर्याएका छन् । ‘गाउँ–गाउँमा सिंहदरबारको नारा दिएर लुट मच्चाइरहनुभएको स्थानीय सरकारका पदाधिकारीले यो बुझ्नुहोस्, तपाईँ मुसहर बालबालिकाको प्रतिनिधि हो कि होइन ?’ प्रश्न गर्दै उनले भने, ‘तपाईँहरु हात उठाउँनुहोस्, जनस्तरबाट मुसहर समुदायलाई हामी सहयोग गर्छौँ ।’
वडा नं. ६ को सरोना मुसहर बस्तीका करिब २०–२५ जना विद्यालय उमेर समुहका बालबालिका विद्यालय नजाने गरेको रिपोर्ट हाम्रो शब्दले गत पुष २२ गते प्रकाशन गरेको थियो ।
यो पनि…..
