रामधुनी । नेपाल कम्युनिष्ट पार्टी (नेकपा) रामधुनीका अध्यक्ष राम कोइरालालाई केपी ओली समूहमा लागेपछि प्रचण्ड–माधव नेपाल समूहले पदबाट हटाउँने प्रकृया सुरु गरेको छ ।
नेकपा रामधुनीका सचिव उत्तम पौडेलको अध्यक्षतामा आइतबार बसेको नगर कमिटीको कार्यालय बैठकले कोइरालालाई अध्यक्षबाट निष्कासन गर्ने निर्णय गरेको पार्टीको नगर कमिटीका संगठन विभाग प्रमुख खगेन्द्र काफ्लेले जानकारी दिए ।
नगर कार्यालयको उक्त निर्णयलाई जिल्ला कमिटीले अनुमोदन गर्नुपर्ने छ । कोइरालाको कारवाहीलाई अनुमोदन गर्न आग्रहसहित जिल्ला कमिटीलाई पत्रसमेत पठाइसकिएको सचिव पौडेलले जानकारी दिए ।
पार्टी हितविपरीत क्रियाकलाप गरेको भन्दै नेकपाको अन्तरिम बिधान २०७५ को धारा ४४ (क) को ३ बमोजिम अध्यक्ष कोइरालालाई पदबाट निष्काशन गर्ने निर्णय गरिएको सचिव पौडेलले हाम्रो शब्दलाई जानकारी दिए ।
प्रचण्ड–माधव समूहका मानिने अध्यक्ष कोइराला गएको बिहीबार सुनसरीको दुहवीमा उपप्रधानमन्त्रीसमेत रहेका ओली समूहका नेता इश्वर पोखरेल उपस्थित कार्यक्रममा मञ्चमा देखिएपछि उक्त समूहमा खुलेका हुन् । हाम्रो शब्दसँगको कुराकानीमा उनले आफु ओली समूहमा लागेको कुरा सत्य भएको बताइसकेका छन् ।
