रामधुनी । नेकपाको प्रचण्ड–माधव नेपाल समूहमा लागेका सुनसरीको रामधुनी नगर कमिटीका इन्चार्ज, सह–इन्चार्ज र सचिवसहितलाई केपी ओली समूहले कारबाही गरेर पदबाट निष्काशन गरेको छ ।
बिहीबार ओली समूहले आयोजना गरेको नेकपा रामधुनीको बिस्तारीत बैठकले इन्चार्ज श्यामनारायण राजधामी, सह–इन्चार्ज दिनेश चौधरी, सचिव उत्तम पौडेलसहित कार्यलय सदस्य बलराम चौलागाई र खगेन्द्र काफ्लेलाई पदबाट निष्काशन गरेको ओली समूहका नगर कमिटी अध्यक्ष योगेन्द्र खड्काले हाम्रो शब्दलाई जानकारी दिए ।
पार्टी हितविपरीत गतिबिधि गरेको भन्दै उनीहरुलाई कारवाही गरिएको उक्त समूहले जनाएको छ । पदबाट निष्काशन गरिएको भएपनि सदस्यमा भने उनीहरुलाई यथावत नै राखिएको छ ।
ओली समूहले इन्चार्जमा राजधामीलाई हटाएर शंकरलाल चौधरीलाई, सह–इन्चार्जमा चौधरीलाई हटाएर रुद्र बस्नेतलाई र सचिवमा पौडेललाई हटाएर राजेश लम्साललाई चयनसमेत गरिसकेको छ ।
यसअघि ओली समूहमा लागेका नेकपा रामधुनीका अध्यक्ष राम कोइरालालाई प्रचण्ड–माधव समूहले अध्यक्षबाट निष्काशन गरेको थियो । राजनीतिक रुपमा पार्टी विभाजित भएपछि एक समूहले अर्को समूहलाई कारवाही गर्ने क्रम चलिरहेको छ ।
