झुम्का कारागारमा दुई दिनभित्रै दुई कैदीबन्दीको मृत्यु

रामधुनी । सुनसरीको झुम्का कारागारमा दुई कैदीबन्दीको उपचारका क्रममा मृत्यु भएको छ । गढी गाउँपालिका–६ का ५२ वर्षीय रामदेव उराँव र धरान उपमहानगरपालिका–१० का २४ वर्षीय सागर राईको आइतबार र सोमबार क्रमशः धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा निधन भएको हो ।

कारागार प्रशासनका निमित्त प्रमुख राम निरौलाका अनुसार उराँवलाई श्वासप्रश्वासमा समस्या देखिएको थियो भने राईलाई वान्ता हुने र शरीर नचल्ने समस्या देखिएपछि उपचारका लागि अस्पताल लगिएको थियो । उराँव २०७७ सालदेखि कर्तव्य ज्यान मुद्दामा कैद भुक्तान गरिरहेका थिए ।  उनलाई अदालतले २५ वर्षको सजाय सुनाएको थियो । राई भने २०८१ सालदेखि लागुऔषध मुद्दामा पुर्पक्षमा थुनामा थिए ।

यसअघि गत भदौ ४ गते धरान उपमहानगरपालिका–१२ बस्ने २८ वर्षीय विकास राईको पनि उपचारकै क्रममा मृत्यु भएको थियो ।

पहाडी जिल्लाका बिरामी परेका कैदीबन्दीलाई सहज उपचार उपलब्ध गराउन सुगम स्थानमा रहेको झुम्का कारागारमा सारिने भएकाले यस्ता घटनाहरू सुनिनु सामान्य भएको कारागार प्रशासनको दावी छ ।

हाल झुम्का कारागारका हाल १ हजार ७९४ जना कैदीबन्दी रहेका छन् । यो कारागार नेपालकै ठूला कारागारमध्येमा पर्दछ ।