रामधुनी मन्दिर चिनाउने अभियानमा देशभर घुम्दै बालकवि विनोद

रामधुनी । रामधुनी नगरपालिका–३ निवासी १९ वर्षीय विनोद भट्टराई- जो ‘बालकवि विनोद’ को नामले चिनिन्छन् । आफ्नै ठाउँमा अवस्थित ऐतिहासिक रामधुनी मन्दिरलाई राष्ट्रिय चिनारी दिलाउने उद्देश्यले यतिबेला देशव्यापी यात्रा गरिरहेका छन् उनी ।

‘विना पैसा नेपाल भ्रमण’ नामक अभियान अन्तर्गत उनले विगत ६३ दिनदेखि देशका प्रमुख शहर र दुर्गम गाउँसम्मको यात्रा गरिरहेका छन् । उनको यात्रा ताप्लेजुङदेखि, काठमाडौं, पोखरा हुँदै हाल सुदूरपश्चिमको धनगढीमा पुगेको छ ।

यात्राका क्रममा भट्टराईले राजनीतिक, धार्मिक तथा सामाजिक क्षेत्रका विशिष्ट व्यक्तित्वहरूसँग भेट गर्दै रामधुनी मन्दिरको ऐतिहासिक, पौराणिक र धार्मिक महत्वबारे जानकारी गराउँदै आएका छन् । यात्राकै क्रममा उनले पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेपाली कांग्रेसका सभापति एवं पूर्वप्रधानमन्त्री शेरबहादुर देउवा, कोशी प्रदेशका मुख्यमन्त्री हिकमतकुमार कार्की लगायतलाई भेटेर रामधुनीबारे जानकारी गराएका छन् । नेताहरूले आफ्नो अभियानप्रति चासो देखाएर सकारात्मक रुपमा लिएको भट्टराईको भनाइ छ ।

भट्टराईको अभियानमा कुनै प्रायोजन वा आर्थिक सहयोग छैन । उनी सार्वजनिक सवारीसाधन, ट्रक, माइक्रो वा बाटोमा लिफ्ट माग्दै यात्रा गरिरहेका छन् । सबैको सद्भाव, सहयोग र आतिथ्यले आफूलाई अघि बढ्न प्रेरित गरिरहेको उनी बताउँछन् । तथापी यात्राका क्रममा खान र बस्न समस्या हुने गरेको उनले बताए ।

भट्टराई रामधुनी मन्दिरलाई धार्मिक पर्यटनको एक महत्वपूर्ण गन्तव्यका रूपमा विकास गर्न स्थानीय, प्रदेश र संघीय तहका सरकारको ध्यानाकर्षण गराइरहेका छन् । उनले यस्तो अभियानबाट स्थानीय गौरवको विषयलाई राष्ट्रिय चासोमा रूपान्तरण गर्न सकिने विश्वास व्यक्त गरेका छन् । ‘मेरो अभियान व्यक्तिगत स्वार्थका लागि होइन । रामधुनी मन्दिरलाई धार्मिक पर्यटनको एक महत्वपूर्ण गन्तव्यका रूपमा विकास गर्न सबै तहका सरकारको ध्यानाकर्षण गराउँने र यो मन्दिर राष्ट्रिय चासोको बिषय बनाउँने उद्देश्य हो, ’ उनले भने ।

त्यसैगरी, उनी युवा नेतृत्वको प्रवर्द्धनमा पनि सक्रिय देखिएका छन् । उनले हरेक ठाउँमा पुगेर आगामी २०८४ सालको आम निर्वाचनमा युवाहरुले नेतृत्व लिनुपर्ने आह्वान गरिरहेका छन् । उनले भने, ‘युवालाई चुनावी प्रतिस्पर्धामा उत्रन आह्वान गरिरहेको छु । सक्षम युवाहरुले हरेक ठाउँमा चुनाव जित्नुपर्छ । यो देशमा आमुल परिवर्तनको खाँचो छ ।’ देशभरका सबै ७७ ओटै जिल्ला र सकेसम्म प्रत्येक स्थानीय तहमा पुग्ने आफ्नो योजना रहेको भट्टराईको भनाई छ ।

देशभर घुमेर विनोदले चिनाउँन चाहेको रामधुनी मन्दिरको बिशेषता के हो ?

सुनसरीको रामधुनी नगरपालिका वडा नं. ४ मा रहेको रामधुनी मन्दिर ऐतिहासिक धार्मिक तिर्थस्थल हो । यहाँको नगरपालिकाको नामाकरण यहि मन्दिरको नामबाट गरिएको हो । जनविश्वास अनुसार त्रेतायुगमा वनवासकालीन यात्राका क्रममा भगवान राम एक रात यही स्थानमा आएर बसेका थिए । उनले बालेको धुनीको आगो आजसम्म बलिरहेको जनश्रुति छ, जुन धुनीको खरानीलाई आज पनि भक्तजनहरूले प्रसादको रूपमा निँधारमा लाउँने गर्छन् ।

मन्दिरमा अझै पनि त्रेतायुगसँग जोडिएका धार्मिक प्रतीकहरू सुरक्षित छन्–जस्तै भगवान रामले प्रयोग गरेको भनिने रथको पाङ्ग्रा, खराउ, चिम्टा र अन्य सामग्रीहरू । यहाँ रहेको ‘धुनि’ सधैँ बलिरहन्छ, र मन्दिरभित्र रहेको मूढो निरन्तर सल्काइन्छ, जसलाई देवप्रसादका रूपमा निँधारमा लाउँने गरिन्छ । रामधुनी क्षेत्र पुरातात्विक किम्बदन्तीहरूले भरिएको छ । जनश्रुतिमा भनिए अनुसार वनखण्डी बाबाले यहाँको सखुवाको रुखमा चिम्टा रोपेर आँप फलाएका थिए ।

मन्दिर क्षेत्र भित्रै ठूलो पोखरी छ, जसको पानी कहिल्यै सुक्दैन भनिन्छ । जसमा घेराबार गरिएको, फलैंचासहितको परिसर, पछाडिपट्टिको शान्त जंगल र भक्तिभावले भरिएको वातावरणले यहाँ आउने जो–कोहीलाई अध्यात्मिक ऊर्जा प्रदान गर्छ । रामनवमी, बालाचतुर्दशी, विवाहपञ्चमी जस्ता पर्वहरूमा यहाँ ठूलो भीड लाग्ने गर्छ ।