कोशी प्रदेशका १० जिल्लामा लम्पी स्किन रोगको संक्रमण, सांसदद्वारा प्रदेश सरकारको ध्यानाकर्षण

सुनसरी । कोशी प्रदेशका १० जिल्लाका पशु चौपायामा लम्पी स्किन रोगको संक्रमण फैलिएको छ । प्रदेश सरकार अन्तर्गतको पशुपन्छी तथा मत्स्य विकास निर्देशनालयका अनुसार १० जिल्लाका २० हजार ५ सय ९० पशुमा संक्रमण फैलिएको हो ।

प्रदेशका ताप्लेजुङ, पाँचथर, इलाम, झापा, मोरङ, सुनसरी, धनकुटा, भोजपुर, उदयपुर र खोटाङमा संक्रमण फैलिएको निर्देशनालयका सूचना अधिकारी विनोद कुमार साहले जानकारी दिए । निर्देशनालयको तथ्याङ्कअनुसार हालसम्म २० हजार ३९२ गाई–गोरु र १९८ राँगा–भैँसीमा संक्रमण देखिएको छ । संक्रमित पशुमध्ये ५ सय ५५ ओटाको मृत्यु भएको छ ।

सबैभन्दा धेरै झापामा १३ हजार ९ सय ८९ पशु प्रभावित भएका छन् भने मोरङमा २ हजार १ सय ७३ र सुनसरीमा १ हजार ५ सय १६ पशु प्रभावित भएका छन् । अन्य जिल्लामा संक्रमण कमै तुलनात्मक रुपमा कम छ ।

असार १५ देखि संक्रमण फैलन सुरु भएको र निरन्तर संक्रमित हुने पशुको संख्या घट्दो क्रममा रहेको निर्देशनालयमा कार्यरत पशु चिकित्सक पुरुषोतम पाण्डेले बताए । उनले भने, ‘असार १५ देखि संक्रमण देखिएको हो । अहिले डाटा हेर्दा घटदो क्रममा छ ।’

लम्पी स्किनविरुद्ध स्थानीय तहमार्फत निःशुल्क खोप दिइने गरेको र प्रत्येक जिल्लामा भेटेरीनरी अस्पताल तथा पशु सेवा विज्ञ केन्द्रमार्फत उपचारमासमेत सहयोग गरिरहेकाले संक्रमण धेरै फैलन नपाएको पाण्डेको दावी छ । उनले भने, ‘हामीलाई संघीय सरकारको पशु सेवा विभागले खोप दिएको छ । त्यसलाई प्रत्येक जिल्लामा भेटेरीनरी अस्पताल तथा पशु सेवा विज्ञ केन्द्रमार्फत स्थानीय तहमा पठाइएको छ । स्थानीय तहमार्फत निःशुल्क खोपका कामहरु भइरहेका छन् । प्रत्येक जिल्ला मार्फत पनि उपचारमा सहयोग गर्दै आएका छौँ ।’

लम्पी स्किन रोग पहिलो पटक नेपालमा २०७७ सालमा मोरङमा देखिएको थियो । त्यसयता देशभर विभिन्न स्थानमा यो रोग फैलिएको छ । विगतमा खोप लगाइए पनि साना बाच्छा र नयाँ पशुमा पुनः संक्रमण देखिएको पाण्डेले बताए ।

सांसदद्वारा प्रदेश सरकारको ध्यानाकर्षण

लम्पी स्किनका कारण पशु चौपायाको मृत्यु भएको भन्दै कोशी प्रदेशसभा सदस्य सपना परियारले प्रदेश सरकारको ध्यानाकर्षण गराएकी छन् ।

मंगलबार बसेको प्रदेश सभाको बैठकमा बोल्दै सांसद परियारले भनिन्, ‘गाई भैँसीमा फैलिएको लम्पी स्किनका कारण किसानको पेशा नै संकटमा पर्ने अवस्था आएको छ ।’

सांसद परियारले मरेका र बिरामी परेका पशु चौपाया पाल्ने पशुपालक किसानलाई राहतको व्यवस्था गर्न सरकारसँग माग गरिन् ।प्रदेशभर फैलिएको लम्पी स्किन रोगप्रति गम्भीर चासो व्यक्त गर्दै उनले सबै स्थानीय तहहरुमा लम्पी स्किनसँग सम्बन्धित खोप अभियान प्रभावकारी रुपमा संचालन गर्नसमेत सरकारसँग आग्रह गरिन ।