बिरामीको नाडी जाँच्ने इनरुवाकी निशाको काँधमा स्वास्थ्य मन्त्रालयको जिम्मेवारी

सुनसरी । सेतो एप्रोन लगाएर बिरामीको नाडी जाँच्ने सुनसरी सदरमुकाम इनरुवाकी ३८ वर्षीया निशा मेहता राष्ट्रिय स्वतन्त्र पार्टीको समानुपातिक सांसद हुँदै स्वास्थ्य तथा जनसंख्या मन्त्री नियुक्त भएकी छन् ।

बिरामीसँगको प्रत्यक्ष अनुभव, स्वास्थ्य प्रणालीका कमजोरीसँगको दैनिक साक्षात्कार गर्दै आएकी उनी नर्स हुँदै अहिले मन्त्रालयको कुर्सीसम्म आइपुगेकी छन् ।

२०७९ को निर्वाचनमा समानुपातिक सूचीमा परे पनि निशाले संसद् छिर्न पाएकी थिइनन् । तर, राजनीति त्यहीँ रोकिएन । रास्वपामा सुरुवातदेखि नै जोडिएकी उनी पार्टीभित्र सक्रिय रहँदै नयाँ अवसरको प्रतीक्षा गरिरहिन् । यसपटक भने उनी संसद् हुँदै मन्त्री पदसम्म पुगिन् ।

भारतको ग्वालियरबाट नर्सिङमा स्नातकोत्तर गरेर फर्किएकी उनले विराटनगरको विराट मेडिकल कलेज टिचिङ हस्पिटलमा काम गर्दै आएकी थिइन ।

उनका श्रीमान् डा. सरोज सिंह कोशी प्रदेश प्रहरी अस्पतालका प्रमुख तथा डीएसपी हुन् । पारिवारिक साथले उनको राजनीतिक यात्रामा महत्वपूर्ण भूमिका खेलेको छ । उनी इनरुवा नगरपालिकाका पूर्व मेयर राजन मेहताकी बहिनीसमेत हुन् ।