सुनसरी । सुनसरी क्षेत्र नं. २ का सांसद लालविक्रम थापाले वर्तमान सरकारले प्रतिशोध साँध्ने काम नगर्ने भन्दै ढुक्क रहन आग्रह गरेका छन् ।
जेनजी आन्दोलनका क्रममा तत्कालीन सरकारले दमन गरेको आरोपमा पूर्वप्रधानमन्त्री एवं नेकपा (एमाले) का अध्यक्ष केपी शर्मा ओली र तत्कालीन गृहमन्त्री रमेश लेखकलाई पक्राउ गरेपछि थापाले सामाजिक सञ्जालमार्फत यस्तो धारणा सार्वजनिक गरेका हुन् ।
उनले लेखेका छन्, ‘कानुनको शासन, मानव अधिकारको सम्मान, अनुसन्धानका विधि-पद्धति र नागरिक मनोभावनाको कदरमा सरकार कटिबद्ध रहुन्जेल रातको अँध्यारोमा होइन, बिहानको सूर्योदयसँगै उज्यालोमा भएका कुरामा हामी कसैले चिन्ता लिनु पर्दैन ।’
थापाले थप भनेका छन्, ‘रोगका विरुद्ध उपचार, सत्य-तथ्यको अनुसन्धान तथा न्याय-अन्यायको निरूपणलाई विवादित नबनाऔँ । हिजो के भयो भन्ने कुराको मूल्याङ्कन नागरिकलाई गर्न दिनुहोस्। तर आजको सरकारले प्रतिशोध साँध्दैन, ढुक्क रहनुहोस् ।’
पार्टी अध्यक्षसमेत रहेका पूर्व प्रधानमन्त्री ओलीलाई प्रतिशोध साँधेर पक्राउ गरिएको भन्दै एमालेले भने आपत्ति जनाएको छ ।
Discussion about this post