रामधुनी । सामुदायीक कुकुर (छाडा कुकुर) नियन्त्रण गर्न रामधुनी नगरपालिकाले सक्रियता देखाएको छ ।
रामधुनी नगरपालिका र भेटेरीनरी अस्पताल तथा पशु सेवाविज्ञ केन्द्र इनरुवाले ‘बन्ध्याकरण शिविर’ सञ्चालन गरेर रामधुनीमा अघिल्लो आर्थिक बर्ष ०८०/०८१ मा २ सय २५ ओटा कुकुरको बन्ध्याकरण गरिएको थियो । चालु आर्थिक बर्ष ०८१/०८२ मा नगरपालिकाले १ सय ६६ ओटा कुकुरको बन्ध्याकरण गरेको पशु सेवा शाखाका साहायक पाँचौ दुर्गा प्रसाद पराजुलीले जानकारी दिए ।
सामुदायीक कुकुरको संख्या अत्यधिक भएकाले नियन्त्रणका शिविर सञ्चालन गरिएको हो । शिविरमा हिमालयन एनिमल रेस्क्यु ट्रस्टको प्राविधिक सहयोग रहेको थियो । समुदायमा छाडा कुकुरका कारण रेबिज बढने, मान्छेलाई हिडडुल गर्नै समस्या हुने, सवारीसाधन दुर्घटना हुने लगायत समस्या बढ्दो छ । त्यसैले कुकुरको प्रजनन्दर घटाएर संख्यामा कमी ल्याउन शिविरले महत्वपूर्ण भूमिका खेल्ने पशु सेवा साखाका प्रमुख शिव कुमार मोचीले बताए ।
शल्यक्रिया गरेर पशु चिकित्सकहरुले कुकुर बन्ध्याकरण गर्ने गरेका छन् । पछिल्लो समय सामुदायिक कुकुर नियन्त्रणका लागि विष सेवन गराएर र कुटेरसमेत मार्ने गरेको पाइन्छ । कुकुरलाई विष सेवन गराएर वा कुटेर मार्न नहुने आवाज पशु अधिकारकर्मीहरुले उठाउदै आएका छन् ।
(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)
Discussion about this post