रामधुनी । रामधुनी नगरपालिकाले ‘उपमेयरसँग बालबालिका’ कार्यक्रमलाई निरन्तरता दिएको छ । उपप्रमुख तारा थापाको अगुवाइमा सञ्चालित यस कार्यक्रम अन्तर्गत यस वर्ष रामधुनी–६ स्थित सरोना मुसहर बस्तीमा रहेका करिब १०० जना बालबालिकालाई शैक्षिक सामग्री वितरण गरिएको छ ।
सामाजिक तथा आर्थिक रूपमा पछाडि पारिएका समुदायका बालबालिकालाई लक्षित गर्दै कार्यक्रम सञ्चालन गरिएको हो । उपमेयर थापाले ती बालबालिकालाई स्कुल झोला, कापी र डटपेन उपलब्ध गराउँदै शिक्षामा पहुँच सहज बनाउने प्रतिबद्धता जनाइन् । उनले भनिन्, ‘शिक्षा सबैको अधिकार हो । विशेषगरी दलित, विपन्न र सीमान्तकृत समुदायका बालबालिकाको उज्ज्वल भविष्यको लागि नगरपालिका सधैँ तत्पर छ ।’
शैक्षिक सामग्री वितरणसँगै उपमेयर थापाले नगरका सबै ९ ओटै वडाका बाल सञ्जालसँग छलफल तथा अन्तरक्रिया कार्यक्रम पनि सम्पन्न गरेकी छन् । ती छलफलहरूमा बालबालिकाले विद्यालय, स्वास्थ्य, बाल अधिकार, सुरक्षा र निर्णय प्रकृयामा सहभागिता लगायतका विषयमा खुलेर आफ्ना विचार राखेका थिए ।
उपमेयर थापाले बाल सञ्जालका प्रतिनिधिहरूसँग समन्वय गर्दै बालमैत्री नीतिहरू निर्माणमासमेत ध्यान दिने बताइन् । उनले भनिन्, ‘बालबालिकाको आवाज सुन्ने र उनीहरूलाई नीतिनिर्माणमा सहभागिता गराउने हाम्रो प्रयास हो ।’ चालु आर्थिक वर्षका लागि ‘उपमेयरसँग बालबालिका’ कार्यक्रम अन्तर्गत नगरपालिकाले ५ लाख रुपैयाँ बजेट विनियोजन गरेको थियो । नगरले अघिल्लो वर्ष पनि ‘उपमेयरसँग बालबालिका’ कार्यक्रम सञ्चालन गरेको थियो ।
उपप्रमुख थापाले यो कार्यक्रमलाई बालबालिकाको क्षमता विकास, आत्मविश्वास अभिवृद्धि र समावेशी विकासको माध्यमका रूपमा लिइरहेकी छन् । उनका अनुसार नगरपालिकाको दीर्घकालीन योजना बालबालिका मैत्री नगर निर्माण गर्नु हो, जसमा हरेक वर्ग, समुदाय र आर्थिक अवस्था कमजोर भएका बालबालिका समान अवसरका साथ अघि बढ्न सकून् भन्ने अभिप्राय राखिएको छ ।
त्यस्तै, नगरपालिकाले वालमैत्री दीगोपना सम्बन्धि अन्तरक्रिया, नगर वाल सञ्जालको नेतृत्व तथा क्षमता बिकास तालिम, नगर वाल सञ्जाललाई आइडी कार्ड, टिसर्ट लगायत वितरण, नगर वाल सञ्जालको नियमित बैठक बस्ने, विभिन्न अनुगमन गर्नेजस्ता कार्यक्रमहरु गर्दै आएको महिला बालबालिका शाखा प्रमुख मोनाश्री आचार्यले जानकारी दिइन ।
(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)
Discussion about this post