प्रधानमन्त्री ओली चीन जाँदै

सुनसरी । प्रधानमन्त्री केपी शर्मा ओली शनिबार चीन प्रस्थान गर्ने भएका छन् । उनी चीनको तियान्जिन सहरमा आइतबार र सोमबार हुने सांघाई कोअपरेसन अर्गनाइजेसन (एससिओ) र एससिओ प्लस शिखर सम्मेलनमा सहभागी हुनेछन् ।

चिनियाँ राष्ट्रपति सी जिनपिङको निमन्त्रणामा चीन जान लागेका प्रधानमन्त्री ओलीले तियान्जिनमा राष्ट्रपति सी र बेइजिङमा उपराष्ट्रपति हान झेङसँग छुट्टाछुट्टै भेटवार्ता गर्ने कार्यक्रम तय भएको परराष्ट्र मन्त्रालयले जनाएको छ ।

सम्मेलनमा भारतीय प्रधानमन्त्री नरेन्द्र मोदी, रुसी राष्ट्रपति भ्लादिमिर पुटिनलगायतका नेताहरू सहभागी हुनेछन् । प्रधानमन्त्री ओली र भारतीय समकक्षी मोदीबीच पनि भेटवार्ताको तयारी भइरहेको छ ।

त्यसपछि बुधबार प्रधानमन्त्री ओलीले बेइजिङमा जापानी आक्रमणविरुद्धको युद्ध तथा फासीवादविरुद्धको विजयको ८० औँ वार्षिकोत्सवको स्मृतिमा आयोजना हुने सैन्य परेडमा समेत सहभागी हुने परराष्ट्रले जनाएको छ । त्यही दिन चिनियाँ राष्ट्रपति सीले विदेशी पाहुनाको सम्मानमा आयोजना गर्ने दिवाभोजमा सहभागी भएर ओली स्वदेश फर्किने कार्यक्रम छ ।