झुम्का बजार व्यवस्थापनका लागि अध्यक्ष वास्तोलाको नेतृत्वमा समिति गठन

रामधुनी । रामधुनी नगरपालिकाले नगर क्षेत्रको मुख्य आर्थिक केन्द्रका रूपमा रहेको झुम्का बजारलाई व्यवस्थित गर्ने तयारी थालेको छ ।

सो उद्देश्यसहित सोमबार आयोजित बजार व्यवस्थापनसम्बन्धी अन्तरक्रिया कार्यक्रममा नगर प्रमुख शंकरलाल चौधरी, उपप्रमुख तारा थापा, प्रमुख प्रशासकीय अधिकृत तेज नारायण यादव, झुम्का उद्योग वाणिज्य संघका अध्यक्ष नविन कुमार चौधरी, विभिन्न राजनीतिक दलका प्रतिनिधि र स्थानीय व्यवसायीहरू सहभागी थिए ।

कार्यक्रमका सहभागीहरूले झुम्का बजारमा रहेको अव्यवस्थित पार्किङ, सडक अतिक्रमण, जथाभावी फालिने फोहोर र अव्यवस्थित पसलहरूका कारण समस्या बढिरहेको बताउँदै तत्काल व्यवस्थापन आवश्यक रहेको सुझाव दिएका थिए ।

त्यसै क्रममा नगरपालिकाले वडा नं. ५ का अध्यक्ष लेखनाथ वास्तोलाको संयोजकत्वमा ११ सदस्यीय बजार व्यवस्थापन अध्ययन समिति गठन गरेको छ । समितिमा वडा नं. १ का वडा सदस्य रामभरोसी रौनियार, उद्योग वाणिज्य संघका अध्यक्ष नविन कुमार चौधरी, तथा अन्य प्रतिनिधिहरू समेत रहेका छन् ।

समितिले ७ दिनभित्र बजार व्यवस्थापनका लागि व्यावहारिक सुझावसहितको प्रतिवेदन नगरपालिकामा पेश गर्नेछ । उक्त प्रतिवेदनका आधारमा नगरपालिकाले सडक, पार्किङ, फोहोर व्यवस्थापन र अव्यवस्थित पसलहरुका सन्दर्भमा मापदण्ड निर्धारण गर्न आवश्यक कार्य अघि बढाउने नगरपालिकाका प्रवक्ता तथा समितिका सदस्य–सचिव सुमन पौडेलले बताए ।