इटहरी ।सुनसरी क्षेत्र नम्बर ३ मा प्रतिनिधिसभा सदस्य पदकी उम्मेदवार भगवती चौधरीले चुनावी प्रतिबद्धता पत्र सार्वजनिक गरेकी छन् । नेकपा एमालेको तर्फबाट उम्मेदवार चौधरीले ‘समृद्ध सुनसरी–३, सम्मानित नागरिक’ भन्ने मूल नारासहित विकास, रोजगारी, सामाजिक न्याय र सुशासनलाई प्राथमिकतामा राख्दै कार्यक्रम अघि सारेकी हुन् ।
उनले विगतमा सुरु गरिएका विकास योजनालाई निरन्तरता दिँदै अधुरा काम सम्पन्न गर्ने प्रतिबद्धता जनाएकी छन् । पछिल्लो तीन वर्षमा १ अर्ब २३ करोड रुपैयाँ बराबरका विभिन्न आयोजना कार्यान्वयनमा आइसकेको उल्लेख गर्दै ती योजनालाई थप प्रभावकारी रूपमा अघि बढाइने उनले बताइन् ।
आवास कार्यक्रमअन्तर्गत २७५ विपन्न परिवारलाई घर हस्तान्तरण गरिसकिएको र आगामी दुई वर्षभित्र थप ४०० परिवारलाई सुरक्षित आवास उपलब्ध गराउने योजना सार्वजनिक गरिएको छ । रोजगारीतर्फ हालसम्म करिब २ हजार जनालाई प्रत्यक्ष रोजगारी उपलब्ध गराइएको उल्लेख गर्दै आगामी दिनमा कम्तीमा ५ हजार नयाँ रोजगारी सिर्जना गर्ने लक्ष्य लिइएको छ । युवालाई सूचना प्रविधि तालिममार्फत स्वदेशमै आयआर्जनमा जोड्ने कार्यक्रम पनि प्राथमिकतामा राखिएको छ ।
महिला सशक्तीकरणतर्फ ५० हजार महिलालाई स्वरोजगार बनाइसकिएको दाबी गर्दै थप ५० हजार महिलालाई आयआर्जनमा जोड्ने योजना अघि सारिएको छ । प्रशासनिक सेवा प्रवाहलाई सहज बनाउन सरकारी कार्यालय, अस्पताल तथा बैंकमा हुने लामो लाइन व्यवस्थापनका लागि सुधारात्मक कदम चालिने उल्लेख छ ।
स्वास्थ्य क्षेत्रमा विपन्न नागरिकका लागि निःशुल्क उपचार, इटहरी र दुहबीस्थित अस्पतालको स्तरोन्नति, लुनकरणदास च्यारिटी अस्पतालमा बर्थिङ सेन्टरसहित सेवा विस्तार, तथा ज्येष्ठ नागरिक लक्षित ‘दन्त उपहार’ कार्यक्रम सञ्चालन गर्ने योजना सार्वजनिक गरिएको छ ।
बाढी–कटान नियन्त्रणका लागि दीर्घकालीन योजना र प्रभावकारी तटबन्ध निर्माण, पर्यटन प्रवद्र्धनअन्तर्गत बजुताल र बुढी झर्नाको संरक्षण तथा होमस्टे विकास, कृषिमा तरकारी पकेट क्षेत्र घोषणा, किसान नेट तथा किसान मार्ट सञ्चालन, वेयरहाउस तथा गोदाम निर्माण र मल–बीउ समयमै उपलब्ध गराउने कार्यक्रम पनि प्रतिबद्धता पत्रमा समेटिएका छन् ।
शिक्षातर्फ एआई आधारित अध्ययन प्रणाली लागू गर्ने, शिक्षक तथा विद्यार्थीलाई आवश्यक तालिम प्रदान गर्ने तथा ‘आउ, पढ, कमाऊ, तिर’ शैक्षिक ऋण कार्यक्रम सञ्चालन गर्ने उल्लेख गरिएको छ। भौतिक पूर्वाधार विकासअन्तर्गत सडक र पुल निर्माणलाई प्राथमिकता दिँदै प्रत्येक घरमा स्वच्छ खानेपानी पु¥याउने लक्ष्य राखिएको छ ।
सामाजिक न्याय सुनिश्चित गर्न भूमिहीन सुकुम्बासीलाई धनीपूर्जा वितरण, श्रमिकको न्यूनतम पारिश्रमिक २५ हजार रुपैयाँ पु¥याउने पहल, तथा नागरिकता समस्यामा परेका नेपालीका लागि ‘हेल्प डेस्क’ स्थापना गर्ने प्रतिबद्धता जनाइएको छ ।
उम्मेदवार चौधरीले भ्रष्टाचारविरुद्ध शून्य सहनशीलताको नीति अपनाउने र प्रतिस्पर्धीको आलोचना भन्दा आफ्ना योजना र कार्यसम्पादनबाट मतदाताको विश्वास जित्ने दाबी गरेकी छन् ।
Discussion about this post