को हुन् एमाले सुनसरी जिल्ला अध्यक्षका उम्मेदवार खेमराज र निलम ?

रामधुनी । नेकपा एमाले सुनसरीको आठौँ जिल्ला अधिवेशन इटहरीमा जारी छ । शनिबार सुरु भएको अधिवेशनमा सर्वसम्मत नेतृत्वको प्रयास भए पनि सहमति नजुटेपछि जिल्ला कमिटीको नयाँ नेतृत्वका लागि भोलि चुनाव हुँदैछ । नेताहरु खेमराज पोख्रेल र निलम खनाल अध्यक्षका उम्मेदवार बनेका छन् ।

पोख्रेल इनरुवा नगरपालिकाका पूर्व मेयर हुन् भने खनाल बराहक्षेत्र नगरपालिकाका पूर्व मेयर हुन् । २०७८ पुसमा भएको ७ औँ जिल्ला अधिवेशनमा रेवतीरमण भण्डारीसँग पराजित भएका खेमराज पोख्रेल पुनः अध्यक्षको प्रतिस्पर्धामा उत्रिएका छन् । निलम खनाल भने निवर्तमान उपाध्यक्षसमेत हुन् ।

पोख्रेल र खनाल प्यानलसहित नै निर्वाचनमा होमिएका छन् । पोख्रेलको नेतृत्वमा उपाध्यक्ष रामधुनीका नन्द कुमार बस्नेत र सचिवमा धरानका पदम लिम्बू छन् । त्यस्तै, खनालको नेतृत्वमा इनरुवाका परशुराम यादव उपाध्यक्ष र रामधुनीका राम कोइराला सचिवमा प्रतिस्पर्धा गर्दैछन् ।

को हुन् खेमराज ?

खेमराज पोख्रेल इनरुवा नगरपालिकाका पूर्व मेयरसमेत हुन् । गत ७ औँ जिल्ला अधिवेशनमा रेवती भण्डारीसँग पराजित भएका उनी पुनः चुनावमा होमिएका छन् । उनी तत्कालीन केपी ओली सरकारले बनाएको सुकुम्वासी आयोग जिल्ला अध्यक्षसमेत हुन् । २०२७ सालदेखि नै कम्युनिष्ट आन्दोलनमा सक्रिय उनी २०५४ सालको स्थानीय निकाय निर्वाचनमा इनरुवा नगरपालिकाको मेयर निर्वाचित भएका थिए । उमेरले ६८ बर्षका पोख्रेल सुनसरीमा एमालेका पुराना नेताहरुमध्ये एक हुन् ।

को हुन् निलम ?

निलम खनाल बराहक्षेत्र नगरपालिकाका पूर्व मेयरसमेत हुन् । पञ्चायत कालदेखि तत्कालीन नेकपा (माले) मा जोडिएर काम गरेका खनाल त्यसपछि शिक्षक संगठनमा आबद्ध भएर नेपालको लोकतान्त्रिक आन्दोलनमा सक्रियतापूर्वक लडेका नेता हुन् । निवर्तमान उपाध्यक्ष रहेका उनी अध्यक्षका बलिया दाबेदार मानिन्छन् । हक्की स्वभावका खनाल एमाले नेता–कार्यकर्तामाझ परिचित व्यक्ति हुन् ।

भोलि बिहान ९ः३० बजेबाट सुरु हुने मतदानमा जिल्लाभरबाट जम्मा करिब ७ सय ३० प्रतिनिधिले मतदान गर्ने बताइएको छ । तर, संस्थापन पक्षले विधानविपरीत प्रतिनिधिको संख्या बढाएको भन्दै उक्त संख्या घटाउनुपर्नेसमेत माग हुँदै आएको छ ।