ओली–पोखरेल दुवै टिममा नसमेटिएपछि उपाध्यक्षमा पराजित आचार्यले केन्द्रीय सदस्यसमेत गुमाए

सुनसरी । नेकपा एमालेका पूर्व केन्द्रीय सचिव तथा कोशी प्रदेशका पूर्व मुख्यमन्त्री भीम आचार्य पार्टीको एघारौँ राष्ट्रिय महाधिवेशनमा दोहोरो पराजय व्येहोर्न बाध्य भएका छन् । नयाँ नेतृत्व चयनका लागि गत बुधबार र बिहीबार (पुस २ र ३ गते) काठमाडौंमा भएको मतदानमा उपाध्यक्षमा पराजित भएका आचार्य केन्द्रीय सदस्यमासमेत निर्वाचित हुन सकेनन् ।

बिहीबार सार्वजनिक मत परिणामअनुसार उपाध्यक्ष पदमा उम्मेदवारी दिएका आचार्यले कुल २ हजार २२७ मतमध्ये जम्मा २६५ मत मात्र प्राप्त गरे । त्यस्तै, केन्द्रीय सदस्यतर्फ उनले ८२९ मत पाए पनि निर्वाचित हुन सकेनन् ।

आचार्य २०५४ सालमा नेपालगञ्जमा सम्पन्न पार्टीको छैटौँ महाधिवेशनबाट केन्द्रीय सदस्यमा निर्वाचित हुँदै केन्द्रीय राजनीतिमा उदाएका नेता हुन् । नवौँ राष्ट्रिय महाधिवेशनमा उनी पार्टीको केन्द्रीय कमिटी सचिवको जिम्मेवारीमा पुगेका थिए । २०७० सालमा संस्कृति, पर्यटन तथा नागरिक उड्डयन मन्त्री बनेका आचार्य एमाले–माओवादी केन्द्र एकतापछि बनेको तत्कालीन नेकपा विभाजनका क्रममा कोशी प्रदेशको मुख्यमन्त्रीसमेत बनेका थिए ।

पूर्वी नेपालमा प्रभावशाली नेताको रूपमा चिनिएका आचार्य पार्टी विभाजनसँगै क्रमशः कमजोर बन्दै गएका थिए । यद्यपि, सुनसरी क्षेत्रमा उनको राजनीतिक पकड अझै बलियो रहेको नेताहरू बताउँछन् ।

महाधिवेशनको संघारमै पोखरा अन्तर्राष्ट्रिय विमानस्थल निर्माणमा भएको करिब ८ अर्ब भ्रष्टाचार प्रकरणमा नाम जोडिएपछि आचार्य थप अप्ठ्यारोमा परे । अध्यक्ष केपी शर्मा ओलीको टिमबाट उपाध्यक्ष बन्ने अपेक्षा गरेका आचार्य उक्त प्रकरणपछि अध्यक्ष ओली र वरिष्ठ नेता ईश्वर पोखरेल दुवै समूहमा समेटिन सकेनन् ।

स्वतन्त्र रूपमा उपाध्यक्ष पदमा उम्मेदवारी दिएका आचार्य अन्ततः उपाध्यक्ष र केन्द्रीय सदस्य दुवै पदमा पराजित भएका हुन् ।
पोखरा अन्तर्राष्ट्रिय विमानस्थल निर्माणका क्रममा भ्रष्टाचार भएको भन्दै अख्तियार दुरुपयोग अनुसन्धान आयोगले करिब ८ अर्ब रुपैयाँ बिगो कायम गरी आचार्यसहित ५ पूर्वमन्त्री र १० पूर्वसचिवसहित ५५ जनाविरुद्ध विशेष अदालतमा भ्रष्टाचार मुद्दा दायर छ ।