रामधुनी । सुनसरीको रामधुनी नगरपालिका–६ स्थित ढेडीगाउँमा इलाका प्रहरी कार्यालय रामधुनीको भवन निर्माणका लागि शिलान्यास गरिएको छ । करिब ३ करोड ३७ लाख लागतमा निर्माण हुन लागेको भवनको शिलान्यास शुक्रबार बिहान एक कार्यक्रमबीच गरिएको हो ।
जिल्ला प्रहरी कार्यालय सुनसरीका प्रहरी उपरीक्षक (एसपी) केशवकुमार थेवेले भवन निर्माणको शिलान्यास गरेका छन् । पाँच कट्ठा क्षेत्रफलमा निर्माण हुने उक्त भवनमा कार्यालय कक्ष, प्रहरी व्यारेक, मेश, शौचालय तथा हावाघर लगायतका संरचना समेटिने जिल्ला प्रहरी कार्यालयले जनाएको छ ।
शिलान्यास कार्यक्रममा रामधुनी नगरपालिकाका नगर प्रमुख शंकरलाल चौधरी, उपप्रमुख तारा थापा, अन्य जनप्रतिनिधि तथा स्थानीयको उपस्थिति रहेको थियो । यद्यपि आगामी फागुन २१ गते हुने निर्वाचनका कारण लागू आचारसंहितालाई ध्यानमा राख्दै नगर प्रमुखको सट्टा एसपी थेवेले औपचारिक रूपमा भवन शिलान्यास गरेका हुन् ।
नगर प्रमुख चौधरीले हाम्रोशब्द डटकमसँगको कुराकानीमा लामो समयदेखिको निरन्तर प्रयासपछि इलाका प्रहरी कार्यालयको आफ्नै भवन बन्न लागेकोमा आफू निकै खुसी भएको प्रतिक्रिया दिए । उनले यसलाई आफ्नो मात्र नभई समग्र रामधुनीबासीका लागि गर्वको विषय भएको बताए । नयाँ भवन निर्माणपछि सुरक्षा सेवा थप प्रभावकारी र व्यवस्थित हुने विश्वाससमेत उनले व्यक्त गरे ।
रामधुनीमा प्रस्तावित इलाका प्रहरी कार्यालय यसअघि नै सञ्चालनमा रहेको छ । तर आफ्नै भवनको अभावमा प्रहरी हाल झुम्का बजारस्थित सुनसरी–मोरङ सिँचाइ आयोजनाको भवनमा अस्थायी रूपमा बस्दै आएका छन् ।
Discussion about this post