बेघालेले गरे धरान खानेपानी डिजिटलाइज, अब सेवाग्राहीले कार्यालय धाउन नपर्ने

धरान । धरान खानेपानी व्यवस्थापन बोर्डले सोमबारदेखि खानेपानीको बिल अनलाइनमार्फत भुक्तानी गर्न सकिने सुविधा सुरु गरेको छ । नयाँ धारा जडानका लागि निवेदन पनि अब अनलाइनबाटै दिन सकिने भएको छ । साथै, बोर्डको हिसाबकिताब सम्बन्धी जानकारी लिन सकिने मोबाइल एप र वेबसाइटसमेत सञ्चालनमा ल्याइएको छ ।

बोर्डका अध्यक्ष तथा धरान उपमहानगरपालिकाका कार्यवाहक प्रमुख अइन्द्र विक्रम बेघाले सञ्चारकर्मीहरूको उपस्थितिमा उक्त डिजिटल प्रणालीको शुभारम्भ गरेका हुन् । उनले भने, ‘सेवाग्राहीलाई सजिलो, छिटो र पारदर्शी सेवा प्रदान गर्ने उद्देश्यले खानेपानी बोर्डलाई डिजिटलाइज गरिएको हो ।’

बेघालेका अनुसार अब खानेपानीको बिलिङ, आर्थिक कारोबार हेर्न तथा भुक्तानी गर्न अनलाइनबाटै सकिनेछ । सेवाग्राहीले निवेदन तथा अन्य प्रशासनिक कामका लागि कार्यालय धाउनुपर्ने झन्झट हटेको उनले बताए । सम्पूर्ण जानकारी, फाराम, नयाँ धारा जडान आवेदन र व्यक्तिगत अभिलेख मोबाइल एप र वेबसाइटमार्फत उपलब्ध गराइएको उनले जानकारी दिए ।

अध्यक्ष बेघालेले बोर्डको लेखा प्रणालीलाई पूर्ण रूपमा पारदर्शी बनाउन डिजिटल प्रणाली लागू गरिएको र आवश्यक ऐन, नियम तथा कानुन निर्माणको प्रक्रिया पनि सुरु भइसकेको बताए ।

उनले छिट्टै खानेपानी बोर्डको अडिट गराई प्रतिवेदन सार्वजनिक गर्ने प्रतिबद्धता व्यक्त गरे ।