इटहरीमा बैशाखभित्रै दमकल सेवा सञ्चालनमा ल्याउने मेयर पौडेलको दाबी

इटहररी । इटहरी उपमहानगरपालिकाले दमकल खरिद प्रक्रिया तीव्र बनाएको जनाएको छ । नगर प्रमुख हेमकर्ण पौडेलले बैशाखभित्रै दमकल सेवा सञ्चालनमा ल्याउने लक्ष्य राखिएको बताएका छन् ।

सामाजिक सञ्जालमार्फत सार्वजनिक धारणा व्यक्त गर्दै उनले नगरको सुरक्षालाई ध्यान दिँदै दमकल खरिद प्रक्रिया अगाडि बढिसकेको बताए । सार्वजनिक खरिदसम्बन्धी कानुनी प्रक्रियाका कारण केही समय लाग्नु स्वाभाविक भए पनि निर्धारित समयभित्रै सेवा सञ्चालनमा ल्याउने तयारी भइरहेको उनको भनाइ छ ।

हालै भएको आगलागीको घटनाप्रति दुःख व्यक्त गर्दै पौडेलले आपतकालीन अवस्थामा नगरबासीको सुरक्षा, स्वास्थ्य र उद्धार सेवामा नगरपालिका पूर्ण रूपमा प्रतिबद्ध रहेको बताए ।

यसैबीच, सामाजिक सञ्जालमा दमकल किन्न चन्दा उठाउनेभन्ने किसिमका भ्रामक र अतिरञ्जित सूचना फैलिएकोप्रति उनले आपत्ति जनाएका छन् । नगरपालिकाले आफ्नै स्रोतबाट कानुनी प्रक्रिया पूरा गर्दै दमकल खरिद गरिरहेको स्पष्ट पार्दै उनले चन्दा वा सहयोगका नाममा रकम माग्ने कार्यमा विश्वास नगर्न नगरबासीलाई आग्रह गरेका छन् ।

नगरपालिकाले सुरक्षित, व्यवस्थित र सक्षम सहर निर्माणतर्फ अघि बढिरहेको उल्लेख गर्दै उनले नागरिकको साथ र विश्वासलाई नै मुख्य आधार मानेर काम गरिरहेको बताए ।