बास्तोलाको जनमुखी कदम- वडाका सबै घरधुरीको स्वास्थ्य बीमामा ५० प्रतिशत अनुदान

रामधुनी । रामधुनी नगरपालिका वडा नम्बर ५ ले वडाभित्रका सबै घरधुरीको स्वास्थ्य सुरक्षालाई प्राथमिकता दिँदै स्वास्थ्य बीमा शुल्कमा ५० प्रतिशत अनुदान दिने भएको छ । मंगलबार १८ औँ नगर सभामा प्रस्तुत आर्थिक वर्ष २०८२/०८३ को बजेट अन्तर्गत वडास्तरीय बजेटबाट रामधुनी-५ ले यस्तो कार्यक्रम ल्याएको हो ।

‘नागरिकसँग वडा अध्यक्ष स्वास्थ्य बीमा कार्यक्रम’ नाम दिइएको यो योजनाका लागि वडाले ३० लाख रुपैयाँ बजेट विनियोजन गरेको छ । यो कार्यक्रमले घरघरमा स्वास्थ्य बीमालाई सहज र सुलभ बनाउने वडा अध्यक्ष भोला बास्तोलाको दावी छ । उनले भने, ‘हामीले प्रत्येक वडावासीको स्वास्थ्य सुरक्षालाई ध्यान दिएर बीमालाई सर्वसुलभ बनाउने र स्वास्थ्य उपचारमा हुने आकस्मिक खर्चबाट बचाउँने योजनाका साथ यो कार्यक्रम ल्याएका छौँ । पछिल्लो जनगणनालाई आधार मान्दा वडामा करिब २ हजार १ सय ४८ घरधुरी छन् । प्रत्येक घरधुरीले स्वास्थ्य बीमा गर्दा लाग्ने खर्चको ५० प्रतिशत रकम वडाले तिर्नेछ ।’

भौतिक संरचना मात्र नभई शिक्षा र स्वास्थ्यजस्ता नागरिकका आधारभूत विषयमा पनि राज्यले गम्भीर भएर लगानी गर्नुपर्ने आवश्यकता रहेको अध्यक्ष बास्तोलाको भनाई छ ।