शंकर मरिक डोमको नेतृत्वमा रामधुनीमा १२ जना नगर प्रहरी नियुक्त

रामधुनी । सुनसरीको रामधुनी नगरपालिकाले १२ जना नगर प्रहरी नियुक्त गरेको छ । नगरपालिकाले ‘नगर प्रहरी ऐन–२०८१’ अनुसार दर्जासहितको संरचना बनाएर नगर प्रहरी नियुक्त गरेको हो ।

नगर प्रहरी सहायक निरीक्षक शंकर मरिक डोमको नेतृत्वमा प्रहरी टोली गठन भएको छ । नगर प्रहरी हवल्दार पदमा खुलातर्फ रामबाबु कार्की र आदिवासी जनजातितर्फ हरि कुमार राई छनोट भएका छन् । नगर प्रहरी जवान पदमा खुला प्रतिस्पर्धाबाट अमृत चौधरी, विज्ञान कट्टेल र रक्कि कुमार चौधरी तथा आदिवासी जनजातिबाट एञ्जिला मगर, महिलातर्फ सुस्मिता कुमारी चौधरी र दलिततर्फ मनिष कुमार मोची नियुक्त भएका छन् ।

नगरपालिकाको स्वीकृत दरबन्दीअनुसार १२ जनामध्ये ३ जना सुजन लामा, चुडानाथ दाहाल र भजनलाल चौधरी पहिले नै सुरक्षा गार्डका रूपमा कार्यरत थिए । उनीहरुलाई नगर प्रहरी जवानमा समायोजन गरिएको छ । बाँकी ९ जना प्रतिस्पर्धाबाट छनोट गरिएको नगरपालिका प्रशासन प्रमुख दुर्गेश कुमार विश्वकर्माले जानकारी दिए । उनले भने, ‘नगर प्रहरी ऐन लागू हुनु अघिदेखि सुरक्षा गार्डका रुपमा कार्यरत ३ जनालाई ऐनअनुसार नै समायोजन गरेर बाँकी ९ जनालाई खुला प्रतिस्पर्धाबाट करारमा नियुक्त गरेका छौँ ।’

नगर क्षेत्रमा शान्ति सुरक्षा कायम गर्न, हाट बजार व्यवस्थापन, खुल्ला चौपाया व्यवस्थापन, नगरपालिकाका नियम कार्यान्वयनमा सहयोग पुर्याउँन, सार्वजनिक सम्पत्ति संरक्षण, अनधिकृत निर्माण कार्यको नियन्त्रणलगायत कार्यका लागि नगर प्रहरी आवश्यक भएको नगर प्रमुख शंकरलाल चौधरीले बताए । नगर प्रमुख चौधरीले नगर प्रहरी गठनसँगै पालिकाको सेवा प्रवाह थप प्रभावकारी हुने विश्वास व्यक्त गरे । ‘सुदृढ स्थानीय शासनका लागि प्रहरी बल आवश्यक थियो,’ उनले भने, ‘अब नगरमा सुरक्षा र व्यवस्थापनसँग जोडिएका काम व्यवस्थित ढंगले अघि बढ्नेछन् ।’