रामधुनी । अखिल नेपाल स्वतन्त्र विद्यार्थी युनियन (क्रान्तिकारी) रामधुनी नगर कमिटीको प्रथम भेला शनिबार झुम्कामा सम्पन्न भएको छ । भेलाले उज्वल निरौलाको अध्यक्षतामा १३ सदस्यीय नयाँ नगर कमिटी सर्वसम्मत रुपमा गठन गरेको छ ।
गठित नगर कमिटीको उपाध्यक्षमा हिमाल चौधरी, सचिवमा विनोद भट्टराई, सह–सचिवमा विवेक नेपाली र कोषाध्यक्षमा करुणा मेहतालाई चयन गरिएको छ । त्यस्तै, सदस्यहरूमा आर्यन साह, सन्तोषी चौधरी, प्रियान्सी साह, सजिना चौधरी, रोशन निरौला, विक्रम कार्की, त्रिशला चौधरी र दिपीका चौधरी चयन भएका छन् ।
कार्यक्रममा उपस्थित नेकपा (माओवादी केन्द्र) की केन्द्रीय सदस्य रामकुमारी चौधरीले नवगठित कार्यसमितिलाई बधाई दिँदै विद्यार्थी संगठनहरू परिवर्तनको अग्रपंक्तिमा रहने भएकाले अध्ययन, विचार र आन्दोलनलाई सन्तुलनमा राख्नुपर्ने बताइन । ‘आजको समयमा संगठन निर्माण मात्र होइन, विचार निर्माण पनि विद्यार्थीहरूले नै गर्नुपर्छ । वैज्ञानिक सोच, जनमुखी शिक्षा र सामाजिक न्यायको पक्षमा आवाज उठाउँदै विद्यार्थीहरूले वैचारिक धारलाई अझ स्पष्ट बनाउन जरुरी छ ।’ उनले भनिन् ।
कार्यक्रममा चौधरीसहित माओवादी कोशी प्रदेश कमिटी सचिवालय सदस्य एवं पूर्व संविधान सभा सदस्य सन्तोष थारु, कोशी प्रदेश कमिटी सदस्य एवं रामधुनी इन्चार्ज दिनेश चौधरी, माओवादी रामधुनी नगर कमिटी अध्यक्ष बलराम चौलागाई लगायतको उपस्थिति रहेको थियो ।
