रामधुनी । रामधुनी नगरपालिकाले इन्धन सुविधा प्राप्त गर्ने कर्मचारीलाई इन्धनबापत नगद उपलब्ध गराउँने घोषणा गरेको छ । आइतबार सुरु भएको रामधुनीको १८ औँ नगर सभामा नीति तथा कार्यक्रम प्रस्तुत गर्दै नगर प्रमुख शंकरलाल चौधरीले यस्तो घोषणा गरेका हुन् ।
इन्धनसँगै सवारीसाधन सुविधान पाउँने कर्मचारीले मर्मतका लागिसमेत नगद पाँउनेछन् । नीति कार्यक्रममा भनिएको छ, ‘पालिकाको मर्मत तथा इन्धन खर्चलाई व्यवस्थित गर्न कर्मचारीलाई कार्यविधि बनाई नगदै भुक्तानी दिने व्यवस्था गरिनेछ ।’
शिक्षामा गुणस्तर वृद्धि गर्न उत्कृष्ट विद्यालय र शिक्षकलाई पुरस्कार, विद्यालय बाहिर रहेका बालबालिकालाई अतिरिक्त तथा अनौपचारिक शिक्षा, अपांगता भएका विद्यार्थीलाई ह्वीलचेयर र विद्यालय नर्सिङ कार्यक्रम सञ्चालन गर्ने योजनाहरू नीति कार्यक्रममा उल्लेख गरिएका छन् । त्यस्तै, विपन्न, दलित तथा पछाडि पारिएका वर्गको स्वास्थ्य बीमा नगरपालिकाले गर्ने, कृषिलाई आधुनिक, वैज्ञानिक र यान्त्रिक बनाउने योजनाका साथै कृषकलाई कृषि परिचयपत्र वितरण गरिने योजना नीति तथा कार्यक्रममा समावेश छ । हालै नगरपालिकाले सञ्चालनमा ल्याएको ५ बेड क्षमताको झुम्का आधारभूत अस्पताललाई १ करोड ८१ लाख ५० हजार बजेट विनियोजन गर्नेसमेत नगर प्रमुख चौधरीले घोषणा गरेका छन् ।
नगर प्रमुख चौधरीले आर्थिक वर्ष २०८२/०८३ का लागि कुल ८३ करोड १३ लाख ६६ हजार ९ सय ४९ रुपैयाँ बराबरको बजेट प्रस्तुत गरेका छन् । बजेटमा चालु खर्चतर्फ ४७ करोड ७३ लाख ७७ हजार र पुँजीगत खर्चतर्फ करिब ३५ करोड ३९ लाख ८९ हजार रुपैयाँ विनियोजन गरिएको छ । आइतबार नीति तथा कार्यक्रम ल्याएको रामधुनीले मंगलबार बजेट ल्याउँने उपप्रमुख तारा थापाले जानकारी दिइन ।
Discussion about this post