रामधुनी । धार्मिक, ऐतिहासिक र सांस्कृतिक दृष्टिले महत्वपूर्ण रामधुनी मन्दिर क्षेत्रलाई पर्यटकीय गन्तव्यका रूपमा विकास गर्न रामधुनी नगरपालिका अघि सरेको छ । सोही पहल अन्तर्गत मन्दिर आउने धार्मिक पर्यटकलाई लक्षित गर्दै वडा नं ४ स्थित थारू बस्तीका महिलाहरुले सामूहिक रूपमा होमस्टे सञ्चालनमा ल्याएका छन् ।
स्थानीय महिला समूहद्वारा सञ्चालित यस होमस्टेमा थारू समुदायको मौलिक संस्कृति, रहनसहन र परम्परागत खानपानको अनुभव लिन पर्यटक आकर्षित हुने अपेक्षा गरिएको छ ।
पर्यटन प्रवर्द्धनसहित स्थानीय महिलालाई आर्थिक रूपमा सशक्त बनाउने उद्देश्यले रामधुनी नगरपालिकाले होमस्टेमा निरन्तर सहयोग गर्दै आएको छ । चालु आर्थिक वर्षमा नगरपालिकाले ४ लाख रुपैयाँ बजेट विनियोजन गरेको थियो भने वडा कार्यालयले थप १ लाख ५० हजार रुपैयाँको सहयोग गरेको वडा अध्यक्ष कमल कार्की बताउँछन् ।
उनका अनुसार आगामी आर्थिक वर्षका लागि पनि ३ लाख बजेट विनियोजन भइसकेको छ । साथै, भर्खरै नगरपालिकाको सहयोगमा होमस्टे प्रवर्द्धन तथा अन्तरक्रिया कार्यक्रमसमेत सम्पन्न भएको छ । जसले सञ्चालक महिलाहरुको क्षमता अभिवृद्धिमा योगदान पुर्याएको छ ।
रामधुनी मन्दिर वरपरको पर्यटकीय सम्भावनालाई उपयोग गर्दै यस क्षेत्रलाई धार्मिक पर्यटनको गन्तव्यसँगै ग्रामीण होमस्टे पर्यटनको नमूना केन्द्र बनाउने लक्ष्यमा आफुहरु लागिपरेको नगरपालिकाको दावी छ ।
(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)
Discussion about this post