रामधुनी । रामधुनी नगरपालिका वडा नम्बर २ ले कृषिमा यान्त्रिकीकरण र प्रविधि विस्तारका लागि उल्लेखनीय पहल गरिरहेको छ ।कृषकको उत्पादन वृद्धि र कृषि लागत घटाउन वडाले टनेल वितरण, प्लास्टिक मल्चिङ र विषादी छर्ने स्प्रे मेसिन वितरण गरिरहेको छ ।
वडाका अनुसार वडाभित्रका कृषकलाई प्रविधि र उपकरणमा पहुँच बढाउँनका लागि यसतो कार्यक्रम अघि सारिएको हो । टनेल प्रविधिले मौसमी जोखिम न्यूनीकरणसँगै उत्पादन बढाउँन सहयोग गर्छ भने प्लास्टिक मल्चिङ प्रयोगले किसानको लागत कम गराउँने, रोगकिरा कम गराउँने, मलिलोपन तथा चिस्यान कायम गर्न सहयोग गर्ने रामधुनीकी कृषि प्राविधिक दुर्गा सापकोटाले बताइन । साथै, विषादी छर्ने स्प्रे मेसिनले रोग–कीरा नियन्त्रण सजिलो बनाउने उनको भनाई छ ।
कृषिमा आधारित वडा भएकाले कृषकलाई नयाँ प्रविधिमा पहुँच बढाउँदै कृषि आधुनिकरणमा लानका लागि यस्ता कार्यक्रम अघि सारिएको वडा अध्यक्ष रामनारायण चौधरीले बताए । उनले भने, ‘वडाले यस कार्यक्रमअन्तर्गत विभिन्न किसान समूह र व्यक्तिगत कृषकलाई टनेल, मल्चिङ र स्प्रे मेसिन प्रदान गरिसकेको छ । यसबाट उत्पादन लागत घट्नुका साथै उत्पादनको गुणस्तर र मात्रा दुवै बढ्ने अपेक्षा गरिएको छ । हामीले प्रत्येक बर्ष कृषिमा बजेट विनियोजन गर्दै आएका छौँ ।’
(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)
Discussion about this post