बराहक्षेत्र नगरपालिकाबाटै मालपोत र नापी सेवा सुरु

सुनसरी । बराहक्षेत्र नगरपालिकाले चक्रघट्टिस्थित नगरपालिकाको कार्यालयबाटै मालपोत र नापीसम्बन्धी सेवा सुरु गरेको छ । भूमि व्यवस्थापन शाखामार्फत सेवा सञ्चालनमा ल्याइएपछि जग्गासम्बन्धी कामका लागि इनरुवा र धरान धाउनुपर्ने सेवाग्राहीको बाध्यता कम हुने भएको छ ।

नगर प्रमुख रमेश कार्कीको अध्यक्षतामा असोज २६ गते आयोजित कार्यक्रममा नगरपालिकाबाट प्रदान गरिने भूमि प्रशासन सेवाको उद्घाटन गरिएको हो । कार्यक्रममा नगर उपप्रमुख नन्दकुमारी सुनुवार, प्रमुख प्रशासकीय अधिकृत राधिका गिरी, भूमि प्रशासन कार्यालय सुनसरीका प्रमुख ओमकारप्रसाद न्यौपाने, नापी कार्यालय इनरुवाका प्रमुख नापी अधिकृत सञ्जिककुमार राउत र भूमि प्रशासन कार्यालय धरानका प्रमुख अम्बिकाप्रसाद चौलागाईलगायतको उपस्थिति थियो ।

नगरपालिकाको भूमि व्यवस्थापन शाखाबाट भू-संशोधन नियमावली, २०८३ अनुसारका सेवासहित नक्सा प्रिन्ट, कित्ताकाट, फिल्ड रेखांकन, कित्ता एकीकरण र नक्सा अद्यावधिकलगायतका सेवा उपलब्ध हुने नगरपालिकाले जनाएको छ ।

त्यसैगरी जग्गा रजिस्ट्रेसन (पास), नामसारी, दाखिलखारेज, लगत कट्टा, जग्गा रोक्का तथा रोक्का फुकुवा, जग्गाधनी दर्ता प्रमाणपुर्जा वितरण र भू–उपयोग क्षेत्र वर्गीकरणसम्बन्धी काम पनि नगरपालिकाबाटै गर्न सकिनेछ । राजीनामा, हकहिस्सा, दानपत्र, बकसपत्र, अंशवण्डा, अंशभरपाई, दृष्टिबन्धकी, घर कायम तथा नक्साको प्रमाणित प्रतिलिपि वितरणजस्ता सेवा पनि शाखाबाट उपलब्ध हुने जनाइएको छ ।

सेवा शुभारम्भकै दिन बराहक्षेत्र नगरपालिका-५ का टेकबहादुर सुवेदी र धरान उपमहानगरपालिका-५ की कोपिला पौडेलले जग्गा खरिदसम्बन्धी लिखत पारित गराएका थिए । उनीहरू नगरपालिकाबाट भूमि प्रशासन सेवा लिने पहिलो सेवाग्राही बनेका छन् ।

नगरपालिकाबाटै मालपोत र नापीसम्बन्धी सेवा उपलब्ध हुन थालेपछि स्थानीयवासीको समय र यातायात खर्च बचत हुने अपेक्षा गरिएको छ । यसअघि जग्गासम्बन्धी विभिन्न कामका लागि सेवाग्राहीले इनरुवा र धरानस्थित सम्बन्धित कार्यालय पुग्नुपर्ने अवस्था थियो ।