२२ भदौदेखि झुम्का आधारभूत अस्पतालबाटै स्वास्थ्य बीमा सेवा सुरु हुँने

रामधुनी । आगामी भदौ २२ गतेदेखि रामधुनी नगरपालिका अन्तर्गतको झुम्का आधारभूत अस्पतालमा स्वास्थ्य बीमा सेवा सूचारु हुने भएको छ । आइतबार स्वास्थ्य बीमा बोर्ड र अस्पतालबीच भएको सम्झौता अनुसार अस्पतालले ‘स्वास्थ्य बीमा कार्यक्रमको प्रथम सेवा बिन्दुका रुपमा कार्य’ गर्नुपर्नेछ ।

बोर्डको तर्फबाट कार्यकारी निर्देशक रघुराज काफ्ले र अस्पतालको तर्फबाट रामधुनी नगरपालिकाका जनस्वास्थ्य अधिकृत नगेन्द्र पौडेलले सम्झौता पत्रमा हस्ताक्षेर गरेको नगरपालिकाले जनाएको छ । आइतबार भएको सम्झौता यहि २२ भदौबाट लागु हुनेछ ।

बोर्डले देशभरका विभिन्न २२ स्थानीय तह र २६ अस्पतालसँग स्वास्थ्य बीमा सेवा सम्झौता गरेको छ । त्यसमा झुम्का आधारभूत अस्पतालसमेत समावेश भएको छ । स्वास्थ्य बीमा ऐन २०७४ (प्रथम संशोधन २०८२) र स्वास्थ्य बीमा नियमावली २०७५ मा भएको व्यवस्था अनुसार बीमा सेवा सम्बन्धि सम्झौता भएको हो ।

सम्झौतासँगै रामधुनीबासी इटहरी र इनरुवासम्म पुगेर बीमाको सेवा लिनुपर्ने बाध्यता अन्त्य भएको नगरपालिकाका प्रमुख प्रशासकीय अधिकृत प्रमोद कुमार चौधरीले बताए । उनले भने, ‘यहि भदौ २२ गतेदेखि लागु हुनेगरी सम्झौता भएको छ । यसबाट स्थानीय बासिन्दाले छिटो र सहज तरिकाले स्वास्थ्य बीमाको लाभ लिन सक्नुहुनेछ । स्थानीयले इटहरी तथा इनरुवासम्म पुगेर लिनुपर्ने सेवा अब झुम्कामै सुरु हुँदैछ ।’