रामधुनी गोलीकाण्डको एक महिना : अझै निष्कर्षमा पुग्न सकेन प्रहरी अनुसन्धान

रामधुनी । सुनसरीको रामधुनी नगरपालिका–२, कर्मनिया टोलमा स्थानीय सिटी सफारी चालक ४७ वर्षीय दिनेश चौधरीको गोली प्रहारबाट हत्या भएको आज एक महिना पुगेको छ । तर घटनापछि प्रहरीले ‘गम्भीरतार्पूक गरिरहेको’ भनिएको अनुसन्धान अझै निष्कर्षमा पुग्न सकेको छैन ।

गत असोज २५ गते साँझ करिब ५ बजे चौधरीमाथि अज्ञात समूहले नहर डिलको सडकमा गोली प्रहार गरेको थियो । उनी आफ्नै सिटी सफारी (प्र–१–०२–००४ ह ७८०४) चलाउँदै उत्तरबाट दक्षिणतर्फ जाँदै गर्दा मोटरसाइकलमा आएका तीन जनाको समूहले नजिकै पुगेर गोली हानेको स्थानीयले बताएका थिए । घटनास्थलमै चौधरीको मृत्यु भएको थियो ।

पोष्टमार्टम रिपोर्टले पनि उनको मृत्यु गोली लागेर भएको पुष्टि गरिसकेको छ । तर घटनामा संलग्न दोषीहरूबारे अझै ठोस प्रमाण फेला नपरेको प्रहरीले जनाएको छ ।

घटनापछि जिल्ला प्रहरी कार्यालय सुनसरीका प्रमुख एसपी केशवकुमार थेबे नेतृत्वको टोली तत्काल घटनास्थल पुगेको थियो । अनुसन्धानका लागि विशेष टोलीसमेत खटाइएको प्रहरीको दाबी छ ।

‘तीन जनाको समुहले गोली हानेर बाइकमा भागेको भन्ने छ । ती व्यक्ति फरार छन् । विशेष टिम नै परिचालन गरेर हामीले विभिन्न कोणबाट अनुसंधान गरिरहेका छौँ’ जिल्ला प्रहरी कार्यालय सुनसरीका प्रवक्ता डिएसपी योगराज खतिवडाले भने, ‘अहिलेसम्म निष्कर्शमा चै पुग्न सकिएको छैन ।’

उनका अनुसार पर्याप्त प्रमाण र आधार नपाएकाले अहिलेसम्म कसैमाथि पक्राउ गरिएको छैन ।

घटना भएको एक महिनासम्म दोषी पत्ता नलागेपछि पीडित परिवार भने निराश छन् । उनीहरूले अपराधीलाई शीघ्र पहिचान गरी कानुनी कारबाहीको दायरामा ल्याउन प्रहरीसमक्ष माग गर्दै आएका छन् ।