रामधुनी । सुनसरीको रामधुनी नगरपालिका–३ स्थित भादगाउँ सिनुवारी (भासी) बहुमुखी क्याम्पसको नवनिर्मित भवन शुक्रबार औपचारिक रूपमा उद्घाटन गरिएको छ । त्रिभुवन विश्वविद्यालय अनुदान आयोगका अध्यक्ष प्रा. डा. देव राज अधिकारीले रिबन काटेर भवन उद्घाटन गरेका हुन् ।
उद्घाटन समारोहमा नगर प्रमुख शंकरलाल चौधरी, उपप्रमुख तारा थापा, पूर्व नगर प्रमुख जयप्रकाश चौधरी, क्याम्पस सञ्चालक समितिका अध्यक्ष फौदसिंह थापा, उपाध्यक्ष नारायण प्रसाद काफ्ले लगायतको उपस्थिति रहेको थियो ।
२०६७ सालदेखि सञ्चालनमा आएको क्याम्पसले आफ्नै संरचना नहुँदा वर्षौंदेखि भासी स्कुलकै कक्षाकक्षामा पठनपाठन गर्दै आएको थियो । करिब पाँच वर्षअघि स्थानीय भिम लुइटेल र पुरुषोत्तम काफ्लेले १० कट्ठा जग्गा उपलब्ध गराएपछि क्याम्पस स्थायी भवन निर्माणतर्फ अघि बढेको हो ।
हाल निर्माण सम्पन्न १७ कोठे भवनसहित शौचालय, कम्पाउण्ड, मुख्य गेट र पुस्तकालयको व्यवस्था गरिएको क्याम्पस प्रमुख श्याम चौधरीले बताए । उनका अनुसार विश्वविद्यालय अनुदान आयोगले विभिन्न आर्थिक बर्षमा गरी २ करोड र रामधुनी नगरपालिकाले १ करोड ९३ लाख रुपैयाँ उपलब्ध गराइसकेका छन् । त्यस्तै नगरपालिकाले बस खरिदका लागि थप ३५ लाख बजेट छुट्याएको उनले जानकारी दिए ।
समुदाय, विश्वविद्यालय अनुदान आयोग, राजनीतिक दल र नगरपालिकाको साझा सहयोगले क्याम्पस प्रगतिमार्गमा अघि बढेको क्याम्पस प्रमुख चौधरीको भनाई छ ।
Discussion about this post