इटहरी आसपास बत्ति जाने समस्याले नागरिक हैरान, सेवा सुधार गर्न सांसद थापाको आग्रह

इटहरी । सुनसरी–२ का प्रतिनिधिसभा सदस्य लालबिक्रम थापाले इटहरी आसपासका क्षेत्रमा साँझपख बारम्बार विद्युत अवरोध हुने तथा सम्बन्धित कार्यालयमा सम्पर्क गर्न खोज्दा फोनसमेत नलाग्ने समस्याप्रति सम्बन्धित निकायको ध्यानाकर्षण गराएका छन् ।

सांसद थापाले सामाजिक सञ्जालमार्फत नागरिकले दैनिक रूपमा विद्युत आपूर्तिमा समस्या भोगिरहेको उल्लेख गर्दै यसको वास्तविक कारणबारे स्पष्ट जानकारी दिन र सेवा प्रवाहमा सुधार गर्न आग्रह गरेका हुन् ।

‘सुनसरीको इटहरी आसपासको क्षेत्रमा साँझैपिच्छे झ्यापझ्याप बत्ती जाने र सम्बन्धित कार्यालयमा फोन गर्दा समेत सम्पर्क नहुने गम्भीर समस्या भएको छ,’  थापाले सामाजिक सञ्जालमा लेखेका छन्,  ‘यसको कारणबारे नागरिकलाई स्पष्ट जानकारी दिई सेवा सुधार गर्न सम्बन्धित निकायको तत्काल ध्यानाकर्षण गराउँदछु ।’

विद्युत आपूर्तिमा देखिएको समस्याका कारण सर्वसाधारण, व्यवसायी तथा विद्यार्थीसमेत प्रभावित भइरहेको भन्दै नागरिकले पनि सेवा सुधारको माग गर्दै आएका छन् ।