काठमाडौं । नेपाली कांग्रेसका सभापति गगनकुमार थापाले प्रधानमन्त्री बालेन्द्र साहलाई संयुक्त राष्ट्रसंघको महासभामा नेपालका मुद्दा तथ्य, प्रमाण र वैज्ञानिक अध्ययनसहित प्रस्तुत गर्न सुझाव दिएका छन् ।
आइतबार सानेपास्थित पार्टी केन्द्रीय कार्यालयमा बसेको केन्द्रीय कार्यसम्पादन समितिको बैठकमा बोल्दै थापाले प्रधानमन्त्रीको आसन्न विदेश भ्रमणलाई औपचारिकतामा मात्र सीमित नगर्न आग्रह गरेका हुन् । उनले महासभामा नेपालको तर्फबाट उठाइने विषयको तयारीका लागि प्रधानमन्त्रीलाई आफ्नै सचिवालयको मात्र भर नपरी विज्ञ, विश्वविद्यालयका अनुसन्धानकर्ता तथा सम्बन्धित क्षेत्रका विशेषज्ञसँग व्यापक परामर्श गर्न सुझाव दिएका छन् ।
थापाले जलवायु परिवर्तनका कारण नेपालले भोगिरहेको क्षतिका विषयलाई अन्तर्राष्ट्रिय समुदायसमक्ष वैज्ञानिक प्रमाणसहित प्रस्तुत गर्नुपर्ने बताएका छन् । रसुवाको भोटेकोशीमा आएको विनाशकारी बाढीलगायत पछिल्ला प्राकृतिक विपत्तिलाई उदाहरणका रूपमा प्रस्तुत गर्दै उनले न्यून हरितगृह ग्यास उत्सर्जन गर्ने नेपालले जलवायु परिवर्तनको ठूलो क्षति व्यहोरिरहेको तथ्यलाई अध्ययन र प्रमाणका आधारमा अन्तर्राष्ट्रिय मञ्चमा लैजानुपर्नेमा जोड दिए ।
‘हामीले वर्षौंदेखि जलवायु परिवर्तनको मारमा परेको कुरा उठाउँदै आएका छौं, तर अबका दाबीहरू वैज्ञानिक अध्ययनमा आधारित हुनुपर्छ,’ थापाले बैठकमा भने, ‘नेपालले हानि र नोक्सानीको मुद्दा मात्र नभई अनुदानमा आधारित जलवायु वित्तका लागि पनि कडा लबिङ गर्नुपर्छ ।’
उनले विगतका सरकार र प्रधानमन्त्रीहरूले अन्तर्राष्ट्रिय मञ्चमा उठाएका विषय तथा अघि सारेका पहलहरूको समेत गहिरो अध्ययन गरेर अहिलेको तयारीलाई अघि बढाउन सुझाव दिएका छन् । विगतमा उठाइएका ‘हिमालदेखि महासागरसम्म’ का विषय तथा कोप–२८ मा अघि सारिएका जलवायु न्यायसम्बन्धी पहललाई निरन्तरता दिँदै त्यसलाई थप तथ्य र प्रमाणले बलियो बनाउनुपर्ने उनको भनाइ छ ।
नेपालले अन्तर्राष्ट्रिय मञ्चमा आफ्ना मुद्दा प्रभावकारी रूपमा स्थापित गर्न देशभित्र र बाहिर रहेका दक्ष जनशक्ति तथा विज्ञहरूको सुझाव लिनुपर्ने थापाले बताएका छन् । पर्याप्त अध्ययन, अनुसन्धान र परामर्शसहित तयारी गरेर प्रस्तुत भए मात्रै प्रधानमन्त्रीको विदेश भ्रमणबाट नेपालको पक्षमा ठोस उपलब्धि हासिल गर्न सकिने उनले बताएका छन् ।
Discussion about this post