बराहक्षेत्र । गत शुक्रबार नेकपा एमाले बराहक्षेत्र नगर कमिटी अध्यक्ष गजेन्द्रबहादुर थापाले पदबाट राजीनामा गरेको घोषणा गरे । सामाजिक सञ्जाल फेसबुकमार्फत उनको राजीनामापत्र सार्वजनिक भयो । पत्रमा उल्लेख भएअनुसार उनले पार्टीबाट राजीनामा गर्नुको प्रमुख कारण नेतृत्वसँगको असन्तुष्टी भनेका छन् । यद्यपि अन्तर्य भने अलग रहेको छ ।
हाम्रोशब्दसँगको कुराकानीमा उनले राजिनामाको कारणबारे खुलेर बताएका छन् । विगत केही समययता बराहक्षेत्रमा रहेको सप्तकोसी बहुमुखी क्याम्पससँगको उनको विवाद सतहमा आएको थियो । क्याम्पसको जग्गासँग साँध जोडिएर रहेको उनको जग्गा क्याम्पसले बलजफ्ती गरेर बाटो बनाउन खोजेको थापाले जिकिर गर्दै आएका छन् । यद्यपि पूर्व सहमतिअनुसार नै सँधियार थापाको नम्बरी जमिन र क्याम्पसको जमिनलाई उपयोग गरेर बाटो बनाउन प्रयत्न गरिएको क्याम्पसको दाबी छ ।
विगत तीन महिनायता सतहमा चुलिएको यस् प्रकरणमा क्याम्पस प्रशासन, स्वतन्त्र विधार्थी युनियन, बाटो निर्माण समितिकी संयोजक कमला थापा लगायतको प्रेस बिज्ञप्तीले पनि परोक्ष/प्रत्यक्ष रूपमा थापालाई दोषारोपण गरेको देखिन्छ । यसै प्रकरणमा पार्टीले आफूलाई सहयोग नगरेको, उल्टो आफ्नोविरुद्धमा बिज्ञप्ती जारी गरेको विषयले राजीनामाको स्थितिमा पुगेको उनको तर्क छ । ‘पार्टीभित्र विभिन्न झिनामसिना अनेकन संघर्ष हुन सक्छन्, उनले भने, तर यति ठूलो विषय (जग्गा प्रकरण) मा मलाई पार्टीले असहयोग गरेको हुँदा मन अड्याउँन सकिएन ।’
तथापी आफूले एमालेको सदस्यता भने त्याग नगरेको र एमालेमै साधारण सदस्यको रूपमा रहने उनको भनाई छ । अन्य कुनै दल प्रवेश गर्ने तयारीमा हुनुहुन्छ ? भन्ने हाम्रो शब्दको प्रश्नमा उनले भने, ‘अरु दल प्रवेश गर्ने अहिले सोचेकै छैन्, एमालेमै साधारण सदस्यको रूपमा बस्छु, तर जिम्मेवारी लिन्न ।’
Discussion about this post