रामधुनी । विजया दशमीपछि नेपालीहरुको दोस्रो ठूलो पर्वको रुपमा मनाइने तिहार आउन अब धेरै कुर्नु पर्दैन, संघारमा आइसकेको छ । नेपालीका घर–आँगनमा ढकमक्क फूलहरु फुलेका छन् । सयपत्री र मखमलीजस्ता फूलैफूलले गाउँघरमा रौनक थपिएको छ ।
तिहार भन्नेबित्तिकै सयपत्री फूल सबैको दिमागमा घुम्छ । घर सजाउन, काग, कुकुरको पुजा गर्न, लक्ष्मि पुजा गर्न, गाई–गोरु पुजा गर्न वा दिदीबहिनीले दाजुभाईलाई पुजा गर्न र माला लगाइदिन सयपत्री त अपरिहार्य नै छ ।
आफ्नै प्रयोगका लागि घर गाउँमा रोपे पनि सयपत्रीको व्यावसायिक खेती गर्ने प्रचलन खासै धेरै छैन । त्यसकारण सहर-बजारमा भारतबाट आयात भएको फूलको प्रयोग बढ्दो छ ।
व्यावसायीक फूल खेती खासै नभइरहेको अहिलेको अवस्थामा सुनसरीको बराहक्षेत्र नगरपालिकामा पर्ने सप्तकोशी बहुमुखी क्याम्पसको जग्गामा ढकमक्क फूलेको सयपत्रीले सबैको ध्यान खिचेको छ । यहाँ विद्यार्थीहरुले नयाँ अभ्यास गरेका छन् । क्याम्पसको स्वतन्त्र विद्यार्थी युनियन (स्ववियू) को नेतृत्वमा विद्यार्थीहरुले ८ कठ्ठा क्याम्पसको जग्गामा सयपत्री खेती गरेका छन् ।
वर्षाैंसम्म बाँझो जग्गामा यो बर्ष तिहारलाई लक्षित गरेर उनीहरुले फूल खेती गरेका हुन् । देशमा व्यापार घाटा भइरहने र फूलसमेत भारतबाट किनेर चाडपर्व मनाइने गरेपछि आफुहरुले केहि गरौँ भन्ने सोचेर खेती सुरु गरिएको विद्यार्थीहरु बताउँछन् ।
फूल बेचेर प्राप्त भएको पैसाले विद्यार्थीहरु माझ लोक सेवा, शिक्षक सेवा आयोग र बैकिङ् क्षेत्रका तयारी कक्षा सञ्चालन गरिने स्ववियू सदस्य तथा फूल खेतीकी संयोजक दिपा मग्रातीले बताइन । बजारमा पाइने कृत्रिम फूल र भारतबाट आयातीत फूलको सट्टामा स्थानीय उत्पादन प्रयोग गर्न अपिल गर्दै आफुहरुले उत्पादन गरेको फूल किन्नसमेत उनले अपिल गरेकी छन् ।
‘वर्षाैसम्म खाली रहेको जग्गामा फूल रोप्ने योजना स्ववियू टिमले बनाउँदै गर्दा डर पनि लागेको थियो । यस्तो जग्गामा फूल कसरी सप्रेला ? तर हामी सबैको सक्रियताले सफल भयौँ ।’ उनले भनिन्, ‘सबैजनाले हाम्रो उत्पादन प्रयोग गर्नुहुन्छ होला । भबिष्यमा पनि हामी यस्ता कामहरु गर्दै जानेछौँ ।’
यसअघि पनि यहाँका विद्यार्थीहरुले क्याम्पसको कम्पाउण्डमै फलेको आपँको अचार बनाएर त्यसबाट प्राप्त आम्दानीले अध्यापन अनुमती पत्रको तयारी कक्षा सञ्चालन गरेका थिए ।
Discussion about this post