इटहरी । नेकपा एमालेले कोशी प्रदेशका मुख्यमन्त्री केदार कार्कीलाई अल्पमतमा परेकाले जबर्जस्ती नगरि राजीनामा दिन आग्रह गरेको छ ।
आज एमाले कोशी प्रदेश संसदीय दलका प्रमुख सचेतक रेवती भण्डारीले पत्रकार सम्मेलन गर्दै यस्तो आग्रह गरेका हुन् ।
‘मुख्यमन्त्रीलाई भेटेरै अल्पमतमा पर्नुभयो जबर्जस्ती नगर्नुस्, राजीनामा दिनुहोस् भन्छौँ, यदि मान्नुभएन भने संविधान र कानुनका आधारमा स्टेप चाल्छौं, त्यसपछि उहाँ हट्न बाध्य हुनुहुन्छ ।’ भन्डारीले भने ।
केन्द्रमा सत्ता गठबन्धन हेरफेर भएदेखि नै एमालेले मुख्यमन्त्री कार्कीको राजीनामा माग्दै आएको छ । राजनीतिक हिसाबले अल्पमतमा रहेका कारण कार्कीले राजीनामा दिनुपर्ने एमालेको दावी छ ।
सत्तापक्ष अल्पमतमा र विपक्षी बहुमतमा रहेको अवस्था भएकाले मुख्यमन्त्रीले स्वत राजीनामा दिनुको विकल्प नभएको भन्दै भण्डारीले भने, ‘राजीनामा नदिए संविधान अनुसार विश्वासको मत लिनुप¥यो । यदि प्रक्रियामा पनि नगएर जबर्जस्ती गर्न खोज्नुभयो भने सर्वोच्च अदालतको आदेश, कानुन बमोजिम उहाँलाई हटाउँछौं ।’
प्रदेश सरकार गठनको अन्तिम विकल्पको रुपमा रहेको संविधानको धारा १६८ को उपधारा ५ अनुसार कार्की मुख्यमन्त्री बनेका हुन् ।
केन्द्रमा सत्ता गठबन्धन हेरफेर भएपछि अहिले नेकपा एमाले, नेकपा माओवादी केन्द्र, एकीकृत समाजवादी र जनता समाजवादी पार्टी राजनीतिक रुपमा मुख्यमन्त्रीको विपक्षमा भएकाले सरकार अल्पमतमा परेको एमालेको दावी छ ।
धारा १६८ को उपधारा ५ अनुसार अन्तिम विकल्पको रुपमा सरकार बनेकाले कांग्रेसका शीर्ष नेताहरुको सल्लाह अनुसार नै मुख्यमन्त्री कार्की भने राजीनामा नदिने मोडमा छन् ।
