रामधुनी । फागुन १९ गतेदेखि सुनसरीको इटहरीमा लेखक विजय मल्लद्वारा लिखित ‘बहुला काजीको सपना’ नाटक प्रस्तुत गरिने भएको छ ।
नेकपा (एकीकृत समाजवादी) निकट विद्यार्थी संगठन् अनेरास्ववियू सुनसरीको आयोजना नाटक प्रस्तुत गरिने तयारी गरिएको हो ।
आइतबार इटहरीमा पत्रकार सम्मेलनको आयोजना गर्दै नाटक फागुन १९ देखि ३० गतेसम्म तायारिप्ची भवनमा प्रस्तुत गरिने तयारी गरिएको अनेरास्ववियू सुनसरीका अध्यक्ष अतित किरण नेपालले जानकारी दिए ।
उनका अनुसार ‘क्याम्पस थिएटर सिजन १’ नाम दिएर लामो समयदेखि रिहर्सल गरिदैँ आएको थियो । नाटकको रिहर्सल विद्यार्थीहरूले नै गरेको अध्यक्ष नेपालले बताए । नाटकको निर्देशन विद्यार्थी रोशन आचार्यले गरेका हुन् भने नाट्य प्रशिक्षणको लागि कलालय इटहरीले सहयोग गरेको छ ।
११ दिनसम्म सञ्चालन हुने नाटक हेर्नका लागि टिकट मूल्य तीन सय, पाँच सय र एक हजार रुपैयाँ रहेको छ भने विद्यार्थीहरूलाई ५० प्रतिशत छुटको व्यवस्था रहेकोे छ ।
नाटकको औपचारिक उद्घाटन फागुन १९ गते दिउँसो साढे १ बजे नेकपा (एकीकृत समाजवादी) का महासचिव घनश्याम भुषाल, कोशी प्रदेशका पूर्व मुख्यमन्त्री राजेन्द्र राई, अनेरास्ववियू केन्द्रीय अध्यक्ष आरती लामा लगायतको उपस्थिति हुने अध्यक्ष नेपालले बताए ।
