रामधुनी । मंसिर २७ देखि २९ सम्म काठमाडौंमा हुने नेकपा एमालेको ११ औँ राष्ट्रिय महाधिवेशनका लागि सुनसरी क्षेत्र नम्बर २ मा प्रतिनिधि चयनका लागि भएको निर्वाचनमा डेगराज फुँयाल सर्वाधिक मत प्राप्त गर्न सफल भएका छन् । क्षेत्र नं. २ अन्तर्गत खसेको कुल २ हजार ७१३ मतमध्ये फुँयालले १ हजार ४०८ मत प्राप्त गर्दै सबै प्रतिस्पर्धीलाई पछाडि पारेका हुन् ।
एमालेको विद्यार्थी संगठन अनेरास्ववियु सुनसरीको अध्यक्ष र केन्द्रीय सदस्य हुँदै २०७४ को स्थानीय तह निर्वाचनमा रामधुनी–५ को वडा अध्यक्षसमेत भइसकेका फुँयाल हाल एमाले सुनसरी जिल्ला कमिटीका सदस्य हुन् ।
प्रतिनिधि छनौटमा खुल्लातर्फ फुयालसँगै सुनसरीका पुराना नेता खेमराज पोख्रेल, एमाले सुनसरीका अध्यक्ष पर्शुराम यादव र कोशी प्रदेशका आन्तरिक मामिला तथा कानुन मन्त्री रेवतीरमण भण्डारी पनि निर्वाचित भएका छन् । उनीहरूको मत परिणाम भने फुँयालभन्दा कम रहेको छ ।
पोख्रेलले १ हजार १७८ मत ल्याएका छन् भने अध्यक्ष यादवले १ हजार ४८ मत र मन्त्री भण्डारीले ९ सय ५२ मत प्राप्त गरेको निर्वाचन समितिले जनाएको छ ।
यसपटकको प्रतिनिधि चयनमा अन्य ‘स्थापित’ नेताहरू पराजित भएका छन् । पार्टी जिल्ला सचिव राम कोइराला, इटहरी खानेपानीका पूर्व अध्यक्ष रामप्रसाद चौलागाईँ र रामधुनी नगरपालिकाका मेयर शंकरलाल चौधरीसहितको उम्मेदवारी परे पनि मत परिणाममा उनीहरू पछि परेका हुन् ।
त्यस्तै, महिला तर्फ मन्दिरा भट्टराई, रञ्जु भण्डारी र निरादेवी खनाल आचार्य निर्वाचित भएका छन् । भट्टराईले १ हजार २६६ मत, भण्डारीले १ हजार २१० मत र आचार्यले ९ सय ४२ मत प्राप्त गरेकी छन् ।
युवातर्फ लोकेस निरौला निर्वाचित भएका छन् । निरौलाले १ हजार ४३८ मत ल्याएका थिए । उनीसँग प्रतिस्पर्धा गरेका इटहरीका सुनिल कार्की जम्मा ९ सय ३९ मतमा रोकिए ।
Discussion about this post