प्रचण्ड नेतृत्वको नेकपाले गर्‍यो सुनसरीका चारै क्षेत्रमा उम्मेदवार सिफारिस

सुनसरी । पुष्पकमल दाहाल प्रचण्ड नेतृत्वको नेपाली कम्युनिस्ट पार्टी (नेकपा) ले आगामी फागुन २१ गते हुने संघीय निर्वाचनका लागि सुनसरीका चारै निर्वाचन क्षेत्रमा प्रत्यक्ष तर्फका उम्मेदवार सिफारिस गरेको छ । सुनसरी जिल्ला समितिको पुस ११ गते शुक्रबार बसेको बैठकको निर्णयअनुसार उम्मेदवारको नाम केन्द्रीय समितिमा पठाइएको हो ।

नेकपा सुनसरीका नेता योगेन्द्र प्रसाद मण्डल पप्पुका अनुसार जनसमर्थन, राजनीतिक अनुभव र सक्रियतालाई आधार मानेर उम्मेदवार सिफारिस गरिएको छ । ‘सुनसरीका चारै क्षेत्रमा पार्टीको उपस्थितिलाई अझ बलियो बनाउने गरी सक्षम, अनुभवी र जनआधार भएका नेताहरूको नाम सिफारिस गरिएको छ,’ मण्डलले भने, ‘अन्तिम निर्णय पार्टी केन्द्रीय नेतृत्वले आवश्यक छलफलपछि गर्नेछ ।’

निर्वाचन क्षेत्र नं. १ बाट उमिता बराइली (रिमा), मुक्साम्हाङ्ग मेन्याङ्गवो (मुकेश), अशोक राई, फोक्साहाङ्ग सुब्बा (चोत्लुङ्ग), धरान–१७ का वडाअध्यक्ष सूर्यबहादुर भट्टराई (मनोज), रेवतीरमण राई, विद्यार्थी नेता युवराज राई (अलौकिक) र शारदा खड्काको नाम सिफारिस गरिएको छ । ८ जनाको सिफारिस भए पनि  मेन्याङ्गवो र भट्टराईको संभावना बलियो रहेको नेताहरु बताउँछन् ।

निर्वाचन क्षेत्र नं. २ मा रामकुमारी चौधरी (रोजिना), एकचन्द्र बराल (निर्मल), डम्बर सुवेदी (हिमाल), जिल्ला संयोजक गोविन्द निरौला र विद्यार्थी नेता प्रविण दाहाल सिफारिस सूचीमा परेका छन् । क्षेत्र नं. २ मा रोजिना वा निर्मलमध्ये एकजनाले टिकट पाउँने संभावना रहेको पार्टी स्रोतको दावी छ ।

त्यस्तै निर्वाचन क्षेत्र नं. ३ बाट केशवकुमार विष्ट, सन्तोष थारु (विश्व), भानु मैनाली, कमला दुलाल र दुर्गैस चौधरी सिफारिस भएका छन् । क्षेत्र नं. १ र २ मा साविक माओवादी केन्द्रका उम्मेदवारले टिकट पाउँने संभावना धेरै भएकाले क्षेत्र नं. ३ मा साविक एकीकृत समाजवादीका नेता केशवकुमार विष्टको संभावना बलियो छ । उनी नेकपाका सहसंयोजक माधव कुमार नेपालसँग नजिक छन् ।

निर्वाचन क्षेत्र नं. ४ मा भने पार्टी संयोजक पुष्पकमल दाहाल (प्रचण्ड) सहित मो. महफुज अन्सारी, पदमकुमार अधिकारी, कमलबहादुर कटुवाल र रोशन भट्टराईको नाम सिफारिस गरिएको छ । संयोजक प्रचण्ड सुनसरी नआउँने निश्चितजस्तै छ । यो क्षेत्रमा मो. महफुज अन्सारीको संभावना बलियो रहेको नेताहरु बताउँछन् ।

पार्टीका अनुसार जिल्लाको सिफारिसका आधारमा अब केन्द्रीय तहमा आवश्यक राजनीतिक छलफलपछि अन्तिम उम्मेदवार टुंगो लगाइनेछ । सुनसरीका चारै क्षेत्रमा सशक्त उम्मेदवारमार्फत चुनावी प्रतिस्पर्धामा मजबुत उपस्थिति जनाउने तयारी गरिएको नेकपाले जनाएको छ ।