रामधुनी बोर्डिङले सर्टिफिकेटका नाममा चर्को शुल्क मागेपछि नगरपालिका पुगे विद्यार्थी

रामधुनी । माध्यमिक शिक्षा परीक्षा (एसइई) उत्र्तिण गरेका विद्यार्थीहरुले सर्टिफिकेट लिन जाँदा सुनसरीको रामधुनी नगरपालिकामा पर्ने रामधुनी बोर्डिङ इङ्लिस स्कुलले चर्को शुल्क मागेपछि पीडित विद्यार्थीहरु गुहार माग्न नगरपालिका पुगेका छन् ।

सर्टिफिकेट वापत विद्यालयले ३ हजार ५ सय रुपैया शुल्क लिन खोजेपछि मंगलबार विद्यार्थीहरु जस्मिता श्रेष्ठ, सुमित बास्तोला, अनुषा थापा, बिक्रम श्रेष्ठ र उसन पोखरेल विद्यालयविरुद्ध कारबाहीको माग गर्दै नगरपालिका पुगेका हुन् ।

मंगलबार नगरपालिका कार्यालयलाई सामुहिक रुपमा पत्र लेख्दै उनीहरुले सर्टिफिकेटका लागि आफुहरु ३,५०० शुल्क तिर्न नसक्ने बताएका छन् । पत्रमा उनीहरुले लेखेका छन्, ‘… कक्षा १० सम्म अध्यन गरि सकेको र सर्टिफिकेट लिन जाँदा ३,५०० विद्यार्थीसँग लिन खोजेको र मागेकाले हामी त्यत्रो पैसा दिन सक्दैनौँ ।’

अन्य विद्यालयमा १,००० देखि २,००० सम्म मात्रै लिने गरेको भए पनि रामधुनी बोर्डिङले चर्को शुल्क लिन खोजेकाले कारबाही गर्नुपर्ने विद्यार्थीहरुको माग छ ।

शुल्कको बिषयमा हाम्रोशब्दसँगको कुराकानीमा विद्यालयका प्रधानाध्यापक होम कार्कीले ३,५०० शुल्क लिएको बिषय स्वीकार गरे । ‘हो, यो शुल्कको बिषय आयो । आज मात्रै होइन, विगतदेखि नै यति शुल्क लिँदै आएका छौँ । नीजि विद्यालयमा अलिअलि तलमाथि भयो होला । हामीले कतिजनालाई निःशुल्क पनि त पढाएका छौँ ।’

यस बिषयमा रामधुनी नगरपालिकाका शिक्षा साखा प्रमुख राजन गेलालले चर्को शुल्क लिएको बिषय आफुलाई जानकारी भएको र बिहीबार सम्बन्धित पक्षलाई बोलाएर छलफल गरिने बताए । ‘यो बिषय मेरोमा आएको छ । छलफलका लागि भोलि विद्यालय, विद्यार्थी र प्याब्सनलाई छलफलमा बोलाइको छ ।’ उनले भने, ‘सबै पक्षको छलफलपछि कसरी अगाडि जाने भन्ने निष्कर्श आउँछ ।’