रामधुनी । सुनसरीको धरान उपमहानगरपालिका र धनकुटाको साँगुरिगढी गाउँपालिकाको सिमानामा पर्ने भेडेटार बजार क्षेत्र पूर्वको चर्चित पर्यटकीय गन्तव्यका रुपमा परिचित छ । बिशेष गरेर गर्मी मौसममा शीतलता अनुभूति गर्न यहाँ आन्तरिक र बाह्य पर्यटक पुग्ने गरेका छन् ।
गत बर्ष साउँन ११ गते औपचारिक उद्घाटन गरेर सुरु गरिएको ‘स्काई वाक’ टावरले भेडेटारमा पर्यटकको आकर्षण थप बढाएको छ । वण्डर्स एम्युजमेन्ट पाक्र्स एण्ड अट्रयाक्सन्स प्रालिले २० करोड लगानीमा सञ्चालनमा ल्याएको स्काई वाक अवलोकन गर्न मात्रै गत साउँन ११ यता करिब एक लाख ५० हजारबढी आन्तरिक र बाह्य पर्यटक आएको कम्पनीका प्रोजेक्ट मेनेजर अभिषेक लामिछानेले बताए ।
लामिछानेका अनुसार स्काई वाक अवलोकन गर्न आएकामध्ये पूर्वि तराईसहित नेपालका विभिन्न भागबाट करिब ८० प्रतिशत, करिब १८ प्रतिशत भारतीय र केहि प्रतिशत तेस्रो मुलुकका नागरिकसमेत आउँने गरेका छन् । ‘यहाँ भिजिट गर्न धरानबाट सबैभन्दा धेरै आउँनुहुन्छ । त्यसपछि पूर्वि तराईका विभिन्न ठाउँबाट आउँनुहुन्छ । पश्चिमबाट पनि आउँनुहुन्छ,’ उनले भने, ‘भारतको बिहार, पश्चिम बंगाल, सिक्किम लगायत राज्यबाट पनि पर्यटकहरु आउँनुहुन्छ । प्रतिशतमा भन्ने हो भने नेपाली करिब ८० प्रतिशत, बाँकी १८ प्रतिशतजति भारतीय आउँनुहुन्छ । १÷२ प्रतिशत तेस्रो देशबाट आउँनुहुन्छ ।’
गर्मीमा चिसो हुने र जाडो याममा पारिलो घाम लाग्ने अनुकुल मौसमका कारण भेडेटार क्षेत्र विगतदेखि नै पर्यटकको रोजाइको केन्द्र भएको र त्यसमा स्काई वाकले थप मद्धत गरेको साँगुरिगढी गाउँपालिकाका अध्यक्ष जितेन्द्र राईले बताए । औपचारिक तथ्यांक नभए पनि स्काई वाक बनेपछि भेडेटार क्षेत्रमा उल्लेख्य रुपमा पर्यटक बृद्धि भएको उनको भनाई छ ।
‘पर्यटक आएकै कारण यहाँका होटल व्यवसायीहरु उत्साहीत देखिनुहुन्छ । यो क्षेत्रका किसानले उत्पादन गरेको तरकारी, फलफुल बिक्री भइरहेको छ । यातायात व्यवसायीहरुले पनि राम्रोसँग काम पाइरहनुभएको छ,’ उनले भने, ‘शीतल हावापानी र त्योसँगै नयाँ प्रोजेक्टको रुपमा स्थापना भएको स्काई वाकले यो क्षेत्रमा पर्यटकलाई आकर्षण गरेको छ ।’ स्काई वाकले युवायुवतीदेखि वृद्धवृद्धासम्मलाई नौलो अनुभव दिने भएकाले सबै उमेर समुहका पर्यटक आकर्षित भएको अध्यक्ष राईले बताए ।
विगतदेखि नै भेडेटार पूर्वकै लोकप्रिय पर्यटकीय क्षेत्र भए पनि कोरोना महामारीपछि पर्यटकीय गतिबिधिमा मन्दि छाएको र बिस्तारै पुनः लयमा फर्कन थालेको होटल एसोसियसन भेडेटारका अध्यक्ष टुमराज लिम्बुले बताए । प्राकृतिक शुन्दरता, उपयुक्त मौसम, पर्यटकलाई आकर्षण गर्नका लागि बनाइएका होटल तथा होमस्टे, स्काई वाक लगायत कारण भेडेटार पर्यटकको रोजाईको केन्द्र बनेको लिम्बुको भनाई छ । ‘मुख्यत यहाँको रमणीय प्रकृति, मौसम, राम्रा होटल तथा होमस्टे र नौलो प्रोजेक्टको रुपमा आएको स्काई वाक पर्यटकीय आकर्षणका बिषय हुन् ।’ धरान बजारबाट करिब १६ किलोमिटर दूरीमा पर्ने भेडेटार बजार क्षेत्र वरपर हाल साना ठूला गरि करिब एकसय ओटा होटलहरु सञ्चालनमा छन् ।
Discussion about this post