रामधुनी । रामधुनी नगरपालिकामा ४३ औँ बिपी कोइराला स्मृति दिवसका अवसरमा नेपाली कांग्रेस निकट संगठनहरूले विविध कार्यक्रम गरी दिवस मनाएका छन् । नेपाली कांग्रेस नगर समिति रामधुनीको आयोजनामा तथा नेपाल विद्यार्थी संघको सहकार्यमा भासी माध्यमिक विद्यालयमा आयोजित हाजिरीजवाफ प्रतियोगिता र नेपाल तरुण दलको आयोजनामा झुम्कामा सम्पन्न रक्तदान कार्यक्रमबीच दिवस उल्लासपूर्वक मनाइएको हो ।
हाजिरीजवाफ प्रतियोगितामा रामधुनी क्षेत्रका नौवटा सामुदायिक विद्यालय सहभागी भएका थिए । तीमध्ये जनता मावि सिंगिया पहिलो, पञ्चायत मावि पिप्राहा दोस्रो र आयोजक विद्यालय भासी मावि तेस्रो भएका छन् । प्रतियोगिताका विजयी विद्यालयहरूलाई प्रमुख अतिथि नेपाली कांग्रेस सुनसरीका नेता पंकजकुमार मेहताले नगद पुरस्कारसहित प्रमाणपत्र प्रदान गरेका थिए ।
कार्यक्रम नेपाली कांग्रेस नगर समिति रामधुनीका सभापति सुदीप अधिकारीको अध्यक्षतामा सम्पन्न भएको थियो । कार्यक्रममा कांग्रेसका नेता, शिक्षक, विद्यार्थी, अभिभावक तथा स्थानियको उपस्थिति उल्लेखनीय थियो ।
यही अवसरमा नेपाल तरुण दल नगर समिति रामधुनीले झुम्कामा रक्तदान कार्यक्रम पनि सम्पन्न गरेको छ । बिराट टिचिङ अस्पतालको प्राविधिक सहयोगमा सम्पन्न रक्तदानमा ८५ जनाले रक्तदान गरेका छन् । रक्तदान कार्यक्रममा स्थानीय नेकपा (एमाले) र नेकपा (माओवादी केन्द्र) का नेताहरूको पनि सहभागिता रहेको थियो ।
बिपी कोइरालाको योगदानको सम्झनामा सामाजिक र शैक्षिक चेतनामा थप प्रेरणा मिलोस भन्ने उद्देश्यसहित यी कार्यक्रम आयोजना गरिएको कांग्रेस रामधुनीका सभापति अधिकारीले बताए ।
Discussion about this post